«Док-1 Макс» препарати билан боғлиқ ҳолат юзасидан Давлат хавфсизлик хизмати томонидан жиноят иши қўзғатилганди. Дастлабки тергов ҳаракатлари давомида аниқланишича, «Док-1 Макс» ва «Амбронол» дори воситалари белгиланган тартибда лаборатория синовларидан ўтказилмаган.
Маълум қилинишича, Quramax Medical МЧЖ томонидан Ўзбекистонга импорт қилинган ушбу препаратлар «Дори воситаларини стандартлаштириш илмий маркази» МЧЖ томонидан лаборатория синовларидан ўтказилган ҳамда уларга мувофиқлик сертификатлари расмийлаштирилган.
Дастлабки тергов ҳаракатлари давомида аниқланишича, «Дори воситаларини стандартлаштириш илмий маркази» МЧЖ масъул ходимлари томонидан меъёрий-ҳуқуқий ҳужжат талаблари қўпол равишда бузилиб, ушбу дори воситалари белгиланган тартибда лаборатория синовларидан ўтказилмаганлиги натижасида, сифатсиз препаратларнинг сотувга чиқарилишига йўл қўйилган.
Жиноят иши доирасида Quramax Medical МЧЖнинг икки нафар раҳбар ходимлари ҳамда «Дори воситаларини стандартлаштириш илмий маркази» МЧЖнинг икки нафар масъул ходимлари гумонланувчи шахслар сифатида ДХХ Тергов ҳибсхонасига тегишли тартибда жойлаштирилган.
Кўрилган чора-тадбирлар натижасида Quramax Medical МЧЖ томонидан Ҳиндистондан Ўзбекистонга импорт қилинаётган дори воситаларининг божхона назоратидан ўтказилиши тўхтатилди ҳамда республика дорихоналаридаги бундай препаратлар йиғиб олинди. Ҳозирда бу борадаги тадбирлар давом эттирилмоқда.
«Quramax Medical МЧЖга тегишли дори воситаларини Ўзбекистонда белгиланган тартибда рўйхатдан ўтказилганлиги ҳамда соғлиқни сақлаш тизимидаги мутасадди ходимларнинг ушбу ҳолат бўйича амалга оширган ҳаракатларини текшириш юзасидан зарур чора-тадбирлар амалга оширилмоқда.
Ҳурматли фуқаролар, шу ўринда, эҳтимолий салбий ҳолатларнинг олдини олиш мақсадида, мазкур мавзуга оид текширилмаган ёки асоссиз маълумотларни тарқатмаслигингизни сўраймиз», — дейилади ДХХ хабарида.
Мавзуга доир: Ўзбекистонда «Док-1 Макс»нинг қанча партияси божхона омборида сақланаётгани маълум қилинди
Изоҳ (0)