Қорақалпоғистонда «Док-1 Макс»дан заҳарланган икки нафар бола даволаниш учун Тошкентга олиб келинган. Бу ҳақда республика Соғлиқни сақлаш вазири ўринбосари Акмал Асқаров «Қарақалпақстан» телеканалига берган суҳбатида гапирган.
Суҳбатда вазир ўринбосари Quramax дорилари атрофидаги хабарларга изоҳ берган.
Таъкидланишича, Қорақалпоғистонга ҳам ўз вақтида Quramax компаниясининг дори маҳсулотлари кириб келган. Унинг таркибига қўшилган заҳарли элементлар сабаб ёш болаларда буйрак тўқималарининг зарарланиши содир бўлган. Оқибатда болаларнинг аҳволи ёмонлашиб, баъзида ўлим ҳолатлари ҳам кузатилган.
«Болаларнинг аҳволи ўртача. Жуда яхши ҳам эмас, жуда ёмон ҳам. Кунлик муолажа ва керакли тиббий чоралар кўрилмоқда», — дея «Дарё»га қўшимча қилди вазирлик ахборот хизмати раҳбари Султанбек Зияев.
Акмал Асқаровнинг айтишича, бугунги кунда Қорақалпоғистонда ҳам бу компанияга тегишли, 2022 йилда кириб келган дори воситалар савдоси тўхтатилган ва бу ҳақда халқ орасида тушинтириш ишлари олиб борилмоқда.
Қўшимча қилинишича, Ўзбекистон Соғлиқни сақлаш вазирлиги томонидан тузилган ишчи гуруҳ Қорақалпоғистондаги ҳолатни ўрганиш мақсадида 2023 йилнинг 1—3 январь кунлари республикада бўлиб қайтган.
Аввалроқ «Док-1 Макс» ва «Амбронол» дори воситалари белгиланган тартибда лаборатория синовларидан ўтказилмагани, Quramax Medical’нинг икки нафар раҳбари, «Дори воситаларини стандартлаштириш илмий маркази»нинг эса икки нафар масъул ходими ҳибсга олингани хабар қилинганди.
Изоҳ (0)