Россиянинг Санкт-Петербург шаҳрида ўзбекистонлик аёл боласи билан Кичик Нева дарёсига тушиб кетди. Бу ҳақда 78.ru хабар берди.
Ҳодиса 3 январь куни соат 23:00 атрофида Василеостровский туманидаги Макаров қирғоғидаги 58-уй яқинида содир бўлган. 25 ёшли ўзбекистонлик аёл қўлидаги 4 яшар боласи билан дарёга тушиб кетган. Уларни дарё ёнидан ўтаётганлар сувдан олиб чиққан.
Аёл ва боласи кучли совқотиш оқибатида ўртача оғирликда касалхонага ётқизилган. Ҳозирда ҳодисанинг барча ҳолатларига ойдинлик киритилмоқда.
30 декабрда Россияда ўзбекистонлик 31 ёшли эркак бел соҳасидан пичоқланиши оқибатида вафот этганди.
28 декабрда ўзбекистонлик яна бир эркак Россияда номаълум шахс томонидан пичоқланганди. Ҳодиса эркак автобусдан тушаётганида юз берган. У ўғир тан жароҳати билан касалхонага ётқизилган.
20 декабрь куни Россияда яна бир ўзбекистонлик эркак ҳамюрти томонидан пичоқланиши оқибатида вафот этганди. Улар бирга спиртли ичимлик истеъмол қилган пайтда тўсатдан жанжаллашиб кетган. Оқибатда 36 ёшли ўзбекистонлик эркак ўзининг 41 ёшли ҳамюртининг белига пичоқ билан жароҳат етказган. Шундан сўнг у воқеа жойидан қочиб кетган.
Изоҳ (0)