Россия Украинада уруш бошлаганидан бери 83,5 млрд доллардан кўпроқ маблағ йўқотди

Россия 2022 йилнинг 24 февраль куни Украинага нисбатан уруш бошлаганидан бери жами 6 трлн рубльдан ортиқ — 83,5 млрд доллардан кўпроқ маблағ йўқотди. Бу ҳақда россиялик журналист Иля Варламов навбатдаги видеорепортажида маълум қилган.

Унга кўра, уруш натижасида Россиянинг ЯИМ 4,5 фоизга пасайган, инфляция эса 12,5 фоизга етган. Репортажда таъкидланишича, битта жанговар ракета Россия учун 186 млн рубльга (2,5 млн доллардан ортиқ) тушади. Шу пайтга қадар рус ҳарбийлари томонидан Украинага жами 4000 та ракета учирилган. Фақатгина ракеталарнинг ўзи учун Россия шу кунгача 750 млрд рубль (10,4 млрд доллар) сарфлаган.

Расмий маълумотларга кўра, ўтган йилнинг кузида 318 минг нафар захирадагилар Россия Қуролли кучларига сафарбар қилинган. Сафдор аскар учун ойлик тўланадиган минимал маблағ 195 минг рубльни (2700 доллар), кичик офицерлар учун эса 250 минг рубльни (3500 доллар) ташкил қилади.

Ҳисоб-китобларга кўра, ҳозирда сафарбар қилинганлар учун Россия ойига 167 млрд рубль (2,3 млрд доллар) сарфламоқда.

Урушнинг дастлабки 6 ойида ҳалок бўлган ва яраланганлар учун тўланган компенсация миқдори 113 млрд рубльни (1,6 млрд доллар) ташкил қилган.

Бундан ташқари, 2022 йилнинг январь—сентябрь ойларида Россиядаги жисмоний шахслар ҳисоб рақамларидан жами 36 млрд доллар миқдоридаги маблағ мамлакатдан ташқарига олиб чиқиб кетилган.

Умумий ҳисоблаганда, Россия уруш туфайли 6 трлн рубльдан (83,5 млрд доллар) кўпроқ маблағ йўқотди. Шуни ҳам инобатга олиш керакки, бу рақамлар ичига санкциялар туфайли юзага келган йўқотишлар киритилмаган.