Энг бой россияликлар 2022 йилда деярли 94 миллиард доллар йўқотди

24 февралда Украинада уруш бошланганда энг бой россияликлар жами 46,6 миллиард доллар маблағини йўқотган. Бу ҳақда Bloomberg хабар бермоқда.

Агентлик маълумотларига кўра, улар Ғарб давлатлари томонидан Россияга қарши санкциялар жорий этилганидан кейин яна 47 миллиард доллар йўқотган.

Қайд этилишича, миллиардерлар активларининг камайиши инфляциянинг ўсиши, марказий банкларнинг кескин пул-кредит сиёсати, шунингдек, Украинадаги уруш ва санкциялар туфайли юзага келган глобал тенденциядир.

Йил давомида сайёранинг энг бой одамлари рўйхатидан фақат биринчи 500 нафар тадбиркор деярли 1,4 триллион доллар йўқотган.

Ноябрь ойи бошида россиялик энг бадавлат тадбиркорларнинг йўқотишлари 83,4 миллиард долларга баҳоланган эди. Бу маълумотлар Bloomberg миллиардерлари индексида келтирилган, унга 25 нафар россиялик киради.

Йил бошидан буён Ренова гуруҳи асосчиси Виктор Векселберг россиялик миллиардерлар орасида қолганлардан кўпроқ маблағ йўқотган. Унинг бойлиги 2022 йил 3 октябрь ҳолатига кўра 60,8 фоизга ёки 11,2 миллиард долларга камайиб, 7,24 миллиард долларни ташкил қилган.

Иккинчи ўринда «Северстал» директорлар кенгаши раиси Алексей Мордашов жойлашган бўлиб, унинг бойлиги октябрь ойи бошига келиб 34 фоизга ёки 9,78 миллиард долларга қисқариб, 19,1 миллиард долларга тушган.

Энг бой россиялик ишбилармонлар орасида учинчи ўринда Novatek газ компанияси ва кимё ишлаб чиқарувчи «Сибур»нинг йирик акциядори бўлган тадбиркор Геннадий Тимченко жой олган. Унинг бойлиги 9,66 миллиард долларга (-43,1 фоиз) камайиб, 12,8 миллиард долларни ташкил қилган.