КХДР собиқ ташқи ишлар вазири Ли Ён Хо ва яна беш нафар шимолий кореялик дипломат 2022 йилда қатл қилинган бўлиши мумкин. Бу ҳақда Япониянинг Yomiuri газетаси КХДРдаги манбаларига таяниб хабар берди. Нашр маълумотларига кўра, шу тариқа, Шимолий Корея ҳукумати дипломатларнинг КХДРдан қочиб кетиш имкониятини йўқ қилмоқчи бўлган.
Манбалар айтишича, дипломатлар ёзда ёки кузда қатл қилинган. 2003 йилдан 2007 йилгача Ли Ён Хо КХДРнинг Буюк Британиядаги элчиси бўлган. Ўлдирилган дипломатларнинг қолганлари Ён Хо билан бирга Британия элчихонасида ишлаган. Жанубий Корея ҳукумати Ёнҳуп агентлигига маълум қилишича, улар ўз каналлари орқали қатллар ҳақидаги маълумотларни текширмоқда.
Ли Ён Хо 2016—2020 йилларда КХДР ташқи ишлар вазири бўлган. 2011 йилда у Шимолий Корея ядровий дастури бўйича олти томонлама музокараларда КХДР номидан қатнашган. Дипломат, шунингдек, Дональд Трамп президентлиги даврида АҚШ билан маслаҳатлашувларда иштирок этган.
2022 йилда КХДРда ядровий синовлар ўтказиш кўпайди. 2022 йил 9 сентябрь куни навбатдаги синовлардан кейин Ким Чен Ин Шимолий Кореяни ядро давлати деб эълон қилди.
Аввалроқ КХДРда Корея Меҳнат партияси Марказий қўмитаси котиби, КМП Марказий ҳарбий қўмитаси раиси ўринбосари Пак Чон Чхон ўз лавозимидан озод этилганди. У мамлакатда нуфузи жиҳатидан иккинчи ўринда турадиган ҳарбий мансабдор ҳисобланарди (КХДР етакчиси, олий бош қўмондон Ким Чен Индан кейинги).
Изоҳ (0)