Британия музейи ва Афинадаги Акропол музейи тез орада келишувга эришади, унга мувофиқ, Парфенон мармар ҳайкаллари Грецияга қайтарилади, бу эса иккала томон ўртасида XIX асрда экспонатлар туфайли бошланган зиддиятга нуқта қўяди. Бу ҳақда Bloomberg ўз манбаларига таяниб хабар берди.
Битим шартлари экспонатлар бир неча йиллар мобайнида Буюк Британиядан Грецияга етказилишини, бунинг эвазига бошқа объектлар Лондонга ижарага берилишини, Британия музейи эса юнон ҳайкалларининг гипс нусхаларини қўлга киритишини кўзда тутади. Томонлар якуний келишувга эришганича йўқ, мураккаб муҳокамалар олиб борилмоқда, деди манбалар мармар ҳайкаллар билан боғлиқ логистика қийинчиликларини қайд этиб.
Гап эрамиздан аввалги V асрда қурилган акрополдаги ибодатхона элементлари ҳақида бормоқда, улар 1802 йилда Британиянинг Усмонли империясидаги элчиси лорд Томас Брюс Элгин томонидан олиб кетилган эди. Экспонатлар ҳозирда асосан «Элгин мармари» номи остида машҳурдир.
Ўшанда маҳаллий ҳукумат Британия элчисига Акрополдан «ёзувлар ва шакллар туширилган баъзи тош бўлаклари»ни олиш учун рухсат берган. Шундан кейин юнон ибодатхонаси мармар безакларининг деярли 50 фоизи Лондонга бориб қолган. Айни пайтда уларнинг барчаси Британия музейида сақланади.
1832 йилда мустақилликка эришганидан кейин Греция ҳукумати Буюк Британиядан мармар ҳайкалларни қайтаришни талаб қилди, сўнгги ўн йилликларда ҳукумат бу масала бўйича ўз саъй-ҳаракатларини кучайтирди.
Хусусан, бу муаммони 2018 йил июнида ўша пайтдаги Греция бош вазири Алексис Сипрас британиялик ҳамкасби Тереза Мей билан қўшма матбуот анжуманида тилга олган эди.
Ундан кейинги Греция бош вазири Кириакос Мицотакис 2021 йил ноябрида Афинанинг бу масала бўйича позициясини такрорлаганди.
Ўша йилнинг октябрида ЮНЕСКО Британия музейини экспонатларни Грецияга қайтариш бўйича берган рад жавобини қайта кўриб чиқишга чақириб, бу муаммо ҳукуматлараро хусусиятга эга эканини таъкидлаганди.
Изоҳ (0)