Жанубий Кореяда биринчи марта мияни еб қўядиган амёба билан зарарланиш ҳолати аниқланганди. Корея Касалликларни назорат қилиш ва олдини олиш агентлиги касалликдан илк ўлим кузатилганини маълум қилди.
Бемор 21 декабрь куни вафот этган, марҳум амёба қўзғатган менингит симптомлари билан оғриган. Бундан ташқари унда иситма, бош оғриғи, кўнгил айниши, бўйин қотиши ва гапириш қобилиятини йўқотиш аниқланган. Касаллик даврида марҳум тўрт ойлик саёҳат билан Таиландда бўлган.
Олинган таҳлилларда эркакда ўлимга олиб келадиган бирламчи амёба менингоэнсефалитини келтириб чиқариши мумкин бўлган ўта хавфли бир ҳужайрали Naegleria fowleri мавжудлигини тасдиқланган. Инфекция одатда чучук сувлар, жумладан, кўллар, дарёлар ва иссиқ булоқларда учрайди.
Бу одамларга юқадиган Naegleria’нинг ягона тури бўлиб, касалликдан ўлим 97 фоиздан ошади. Амёба бурун орқали танага киради ва мияга боради, мия тўқималарининг нобуд бўлиши, мия шиши ва ўлимга олиб келади.
Марҳумга вирус қандай юққани ҳақида маълумот берилмаган, бироқ инфекция кўпинча кўлларда ёки дарёларда сузиш, ифлосланган сув билан бурунни ювганда организмга киради.
«Naegleria fowleri амёбаси юқишининг олдини олиш учун fowleri амёбалари қайд этилган ҳудудларга саёҳат қилишда эҳтиёт бўлинг. Бундай ҳудудларда сузиш ва дам олишдан сақланинг, тоза сувдан фойдаланинг», — деб маслаҳат берди Корея Касалликларни назорат қилиш ва олдини олиш директори Ён Ми.
Маълумотларга кўра, сўнгги 60 йил мобайнида амёба билан заҳарланишга боғлиқ 400 га яқин ҳолат қайд этилган, шуларнинг 150 таси — АҚШда аниқланган. 97 фоиз ҳолатда беморлар ҳалок бўлган. Шу билан бирга, мутахассислар айтишича, бу онда-сонда учрайдиган ҳодисадир, чунки касаллик одамдан одамга юқмайди.
Изоҳ (0)