Ўзбекистонда қатъий назорат остида сақланаётган «Док-1 Макс» дорилари ҳақида маълумот берилди.
Давлат божхона қўмитасининг ЎзАга маълум қилишича, декабрь ойида Ўзбекистонга келтирилган «Док-1 Макс» дорисининг учта партияси, яъни салкам 60 минг қутиси қатъий назорат остида сақланмоқда. Бундан ташқари, ушбу дорининг илгари келтирилган иккита партияси ҳам ДБҚ омборида ушлаб турилибди.
Божхона органлари томонидан салбий ҳолатлар кузатилган илк кунларданоқ дори воситасини эркин муомалага чиқармаслик бўйича барча чоралар кўрилган ва ҳозирда қатъий назорат остида.
Қўмита ахборот хизмати раҳбари Ҳусан Тангриевнинг маълум қилишича, «Док-1 Макс» дори воситаси Ўзбекистон бозорига 2012 йилдан кириб келган. Мутахассисларга кўра, мазкур дори воситасининг шу давр мобайнида ножўя таъсири бўлмаган. Фақатгина бир партиясида бундай ножўя таъсир кузатилган.
Амалдаги тартибларга кўра дори воситасини эркин муомалага чиқаришда дори воситасининг Ўзбекистонда рўйхатдан ўтганлигини тасдиқловчи гувоҳнома ҳамда олиб кирилаётган дориларнинг ҳар бир серияси учун мувофиқлик сертификатлари божхона органларига тақдим қилинади. Шундан сўнггина дори воситалари божхона расмийлаштирувидан ўтказилади.
Эслатиб ўтамиз, мазкур сиропни истеъмол қилиш ортидан Самарқандда 18 нафар, Тошкент ва Қашқадарёда бир нафардан, жами 20 нафар бола вафот этгани маълум бўлганди.
ДХХ томонидан «Док-1 Макс» препарати билан боғлиқ ҳолат юзасидан жиноят иши қўзғатилган. «Док-1 Макс»ни ишлаб чиқарган компанияга тегишли барча дорилар савдоси вақтинча тўхтатилган.
Изоҳ (0)