Сирдарё вилоятида «Док-1 Макс» дори воситаси етти нафар бемор болага ножўя таъсир қилган. Бу ҳақда вилоят соғлиқни сақлаш бошқармаси бошлиғи ўринбосари Олтиной Эсанова маълум қилди.
Унинг билдиришича, ҳозирда беморларнинг тўрт нафари соғайган, уч нафари жонлантириш бўлимида даво муолажаларини давом эттирмоқда.
Олтиной Эсанованинг қайд этишича, вилоятда 6 ёшгача бўлган боласи бор оилаларга хабарномалар тарқатилган. Сўнгги пайтларда «Док-1 Макс» дорисини қабул қилган фарзандлар бўлса, ўша ҳудудда ишлаётган оилавий шифокорга мурожаат қилиш кераклигини таъкидлаб, ҳеч қандай таъсири кўринмаган ҳолда ҳам шу дори воситасини истеъмол қилганини маълум қилишларини сўраган.
Бундан аввал Фарғона вилояти соғлиқни сақлаш бошқармаси бошлиғи Абдуқаюм Тўхтақулов Республика шошилинч тиббий ёрдам илмий маркази Фарғона филиалининг болалар реанимация бўлимида 3 ёшли бола «Док-1 Макс» сиропини ичиши натижасида доридан ўткир заҳарланиш ташхиси билан даволанаётганини маълум қилганди.
Эслатиб ўтамиз, мазкур сиропни истеъмол қилиш ортидан Самарқандда 18 нафар, Тошкент ва Қашқадарёда бир нафардан, жами 20 нафар бола вафот этгани маълум бўлганди.
ДХХ томонидан «Док-1 Макс» препарати билан боғлиқ ҳолат юзасидан жиноят иши қўзғатилган. «Док-1 Макс»ни ишлаб чиқарган компанияга тегишли барча дорилар савдоси вақтинча тўхтатилган.
Изоҳ (0)