Германия канцлери Олаф Шольц Россия президенти Владимир Путин билан Украинадаги уруш масаласида вақти-вақти билан мулоқотда бўлиб турибди. Бу ҳақда Германия ҳукумати вакили ўринбосари Кристиане Хоффман Deutsche Welle’га маълум қилган. Унинг сўзларига кўра, Россиянинг бошқа европалик сиёсатчилар билан ҳам дипломатик алоқалари бор.
«Россия билан алоқалар ва мулоқотлар йўқ, деб ҳисоблаш нотўғри бўлган бўларди. Биласизки, федерал канцлер ҳам, Евроиттифоқдаги бошқа сиёсатчилар ҳам президент Путин билан ҳадеб тўғридан-тўғри алоқа ўрнатмоқда. Бошқа даражаларда ҳам, албатта мулоқот сақланмоқда. Бу соҳада жимжитлик ҳукм сурмоқда, деб ўйлаш — нотўғри», — деди у.
Айни вақтда Германия Ташқи ишлар вазирлиги расмий вакили Кристиан Вагнер айтишича, Россия томонидан тинчлик ҳақидаги музокаралар бўйича ишончли таклифлар келиб тушмаяпти.
«Буни сўнгги кунлардаги анча шафқатсиз бомбардимонлар ҳам кўрсатди. Шундай экан, Россиянинг бу хатти-ҳаракатлари жуда аниқ манзарани ҳосил қилади», — деди у.
Аввалроқ Шольц Путиннинг урушдан кўзлаган мақсади ҳақида гапирган эди.
Канцлер Путин билан Украинадаги урушни бир неча бор телефон орқали муҳокама қилгани, уларнинг сўнгги суҳбати бир соат давом этгани ва 2 декабрь куни бўлиб ўтганини айтди. Сиёсатчи Путиннинг позицияси ўзгаришсиз қолаётганини қўшимча қилди.
«Мен ҳар гал Путин билан гаплашсам, у жуда аниқ ниманидир забт этиш ҳақида гапиради. У Украина ҳудудининг бир қисмини куч билан эгаллаб олмоқчи, холос», — дейди Шольц.
Изоҳ (0)