Россияда ўзбекистонлик эркак пичоқланиши оқибатида вафот этди

Россияда ўзбекистонлик 31 ёшли эркак бел соҳасидан пичоқланиши оқибатида вафот этди. Бу ҳақда «78.ru» хабар берди.

Марҳумни Шлисселбург шаҳар касалхонасининг тез ёрдам бўлимига унинг дўстлари олиб келган. Улар касалхонада жанжал кўтариб, у ердаги ходимларга ташланган. Полиция қотилликда гумон қилиб, шифохона биносида муштлашган икки кишидан бири — 28 ёшли йигитни қўлга олган. У ўзбекистонлик эркак билан Морозова номли қишлоқда бирга спиртли ичимлик ичганини тан олган.

Ҳозирда ҳодисанинг барча тафсилотлари ўрганилмоқда. Жиноят ишини қўзғатиш масаласи ҳал қилинмоқда.

Маълумот ўрнида, 28 декабрда ўзбекистонлик эркак Россияда номаълум шахс томонидан пичоқланганди. Ҳодиса эркак автобусдан тушаётганида юз берган. У ўғир тан жароҳати билан касалхонага ётқизилган.

20 декабрь куни Россияда яна бир ўзбекистонлик эркак ҳамюрти томонидан пичоқланиши оқибатида вафот этганди. Улар бирга спиртли ичимлик истеъмол қилган пайтда тўсатдан жанжаллашиб кетган. Оқибатда 36 ёшли ўзбекистонлик эркак ўзининг 41 ёшли ҳамюртининг белига пичоқ билан жароҳат етказган. Шундан сўнг у воқеа жойидан қочиб кетган.