Бухорода қурилаётган кўпқаватли уйнинг 7-қаватида бетон плиталар қулаб тушганди. Қурилиш вазирлиги ҳолат юзасидан қўшимча маълумот берди.
Эслатиб ўтамиз, Бухорода 7 қаватли уй қулаб тушгани ҳақида хабар ижтимоий тармоқларда тарқалгач, зудлик билан айтилган манзилга ихтисослашган ташкилотлар мутахассислари етиб бориб, тарқатилган маълумотлар ҳақиқатга тўғри келмаслиги, фақат 7-қаватдаги дона бетон плиталар қулаб тушгани маълум бўлганди.
Қурилиш вазирлиги матбуот хизмати 7-қаватда тўсин (ригел)ларга таянган 5 та плитанинг тушиб кетиши билан боғлиқ ҳолатнинг аниқ сабабларини эълон қилди.
Аниқланишича, бинонинг асосий юк кўтарувчи конструкцияси раманинг тўсин қисмлари маҳаллий қум-шағал аралашмасидан тайёрланиб, қуйма бетондан бажарилган. Бетон ишлари қурилиш майдоннинг ўзида қум-цемент нисбатига амал қилинмасдан, таваккалчиликка асосланган ҳолда тайёрланган.
Тўсинлар етарлича мустаҳкамлик даражасига эга бўлмасдан туриб, унинг остидаги ёғочли таянч устунчалари олиб ташланган. Ўрнатилган плиталарнинг устига ортиқча юк берилиб, конструкциянинг зўриқишига сабаб бўлган.
Мазкур ҳолат юзасидан Бухоро вилояти қурилиш соҳасида ҳудудий назорат инспекцияси томонидан қурилиш талаблари бузилганлиги учун фуқаро А.С. Маъмурий жавобгарлик тўгрисидаги кодекснинг 99-моддасига (шаҳарсозлик тўғрисидаги қонунчиликни бузиш) асосан жавобгарликка тортилиб, қурилиш-монтаж ишлари тўхтатилди.
Мавзуга доир: Тошкентдаги қурилиш майдонида кран қулаб тушди
Изоҳ (0)