Энергетика вазирлиги штаби томонидан 29 декабрь куни ўтказилган назорат тадбирларида Тошкент шаҳридаги айрим автомобилларга газ тўлдириш компрессор шохобчалари ноқонуний фаолият юритиб келаётгани аниқланди.
Маълум бўлишича, Янгиҳаёт туманида жойлашган «Энергомаштранс Импех» (Шаффоф) МЧЖга АГТКШ ўзбошимчалик билан белгиланган ўчириш графигига риоя этмаган ҳолда ўрнатилган бир марталик тамғаларни бузиб, кўча ёритиш чироқларини ўчирган ҳолда яширинча фаолият кўрсатаётгани маълум бўлди.
Мазкур АГТКШ бугунги кунга қадар 2 маротаба қоидабузарликка йўл қўйгани сабабли унга жорий йилнинг 4 декабрь куни 50 400 метр куб (50,4 млн сўм) ва 21 декабрь куни 921 600 метр куб (921,6 млн сўм) қайта ҳисоб-китоб қилинган.
29 декабрь куни ўтказилган тадбирда АГТКШнинг модем қурилмаси ўчирилгани ва табиий газдан ўзбошимчалик билан фойдаланиб келаётгани сабабли 460 800 метр куб (460,8 млн сўм) қўшимча ҳисоб-китоб қилинди ҳамда табиий газ етказиб бериш тўхтатилди.
Шунингдек, Сергели тумани, Янги Тошкент ҳалқа йўлида жойлашган «Меgа oil biznes» МЧЖга қарашли АГТКШ белгиланган ўчириш графигига риоя этмаган ҳолда ўзбошимчалик билан фаолият кўрсатаётгани маълум бўлди.
Ушбу АГТКШнинг газ ҳисоблагичи белгиланган тартибга кўра уланиш нуқтасида жойлашиши ўрнига шохобча ҳудудида ўрнатилган. Тадбир давомида АГТКШнинг газ ҳисоблагичини кўздан кечириш имконияти бўлмагани сабабли АСКУГ тизими орқали ўрганилганда, «Ҳудудгазтаъминот» АЖнинг метрологлари томонидан газ ҳисоблагичнинг параметрлари ўзгартирилгани бўйича хулоса қилинди.
Шунингдек, мазкур АГТКШ белгиланган кунлик газ сарфини яширинча камайтириб кўрсатиб келаётгани маълум бўлди ва унга табиий газ етказиб бериш тўхтатилди. Аниқланган ҳолатлар юзасидан расмийлаштирилган ҳужжатлар ҳуқуқни муҳофаза қилувчи органларга тақдим этилган.
Изоҳ (0)