Қашқадарёда «Док-1 Макс» сиропини истеъмол қилган 1,5 ёшли бола вафот этди

Қашқадарё вилоятининг Деҳқонобод туманида туғилган 1,5 ёшли бола «Док-1 Макс» сиропини истеъмол қилиши ортидан вафот этди. Бу ҳақда вилоят прокуратураси хабар берди.

Маълум қилинишича, 2021 йил 14 август куни вилоятнинг Деҳқонобод туманида туғилган бола Х.Ш. беш кун давомида «Док-1 Макс» сиропини истеъмол қилиб келиб, соғлиғи ёмонлашгани сабабли 27 декабрь куни Республика шошилинч тиббий ёрдам илмий-амалий маркази Қашқадарё филиалига олиб келинган. Бола кўрсатилган тиббий ёрдамга қарамасдан 28 декабрь куни вафот этган.

Мазкур ҳолат юзасидан Қарши шаҳар прокуратураси томонидан Жиноят кодексининг 186-3-моддаси (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш, дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш, шунингдек, таркибида кучли таъсир қилувчи моддалар мавжуд бўлган дори воситаларини рецепт бўйича чакана реализация қилиш тартибини бузиш) билан жиноят иши қўзғатилиб, дастлабки тергов ҳаракатлари олиб борилмоқда.

Ҳурматли фуқаролар, Соғлиқни сақлаш вазирлиги Фармацевтика тармоғини ривожлантириш агентлигининг 2022 йил 23 декабрдаги буйруғи билан «Док-1 Макс» дори воситаларини дорихоналардан қайтариб олиш белгиланган. Шунга кўра, сизлардан «Док-1 Макс» дори воситаларини қабул қилмасликни, ушбу дори воситалари сотилаётгани ҳамда тавсия қилинаётганидан хабар топсангиз, дарҳол прокуратура ва бошқа ҳуқуқни муҳофаза қилувчи органларга хабар беришингизни сўраймиз, — дейилади вилоят прокуратураси ахборотида.

Мазкур сиропни истеъмол қилиш ортидан Самарқандда 18 нафар, Тошкент ва Қашқадарёда бир нафардан, жами 20 нафар бола вафот этгани маълум бўлган.