Самарқанд вилоят болалар кўп тармоқли тиббиёт маркази директори Маматқул Азизов ишдан олингани, у ва ишдан олинган яна олти нафар шифокорга асл ҳолат ҳақида гапирадиган бўлса, тизимдан бутунлай четлаштирилиши, янада обрўсизлантирилиши мумкинлиги ҳақида огоҳлантирилгани ҳақида хабар берилди.
Мазкур ҳолатга изоҳ берган Самарқанд вилоят Соғлиқни сақлаш бошқармаси ахборот хизмати раҳбари Элдор Муҳаммадиев «бош шифокор 18 нафар боланинг ўлимига сабаб бўлган сироп ҳақида хабар бергани ортидан ишдан олинмаган, бошқа сабаблар бор», деди.
Масъулнинг маълумот беришича, кеча, 28 декабрь куни у Азизовнинг ўринбосари билан шу масалада суҳбатлашган, ўринбосар бош шифокор ишда эканини билдирган. Бугун ўзи бош шифокор билан боғланиб, вазият ҳақида билишга уринганда бунинг имкони бўлмаган.
Билишимча, бош шифокор айнан ўша ҳолат ҳақида хабар бергани учун эмас, олдиндан йўл қўйилган қўпол хато-камчиликлари сабаб ишдан олинган. Мен ҳам бунга аниқлик киритишга уриняпман. Бош шифокор билан суҳбатлашсам ёки бошқа бир аниқ маълумотга эга бўлсам, вазият ҳақида жамоатчиликни хабардор қиламиз, — дейди Элдор Муҳаммадиев.
«Дарё» Соғлиқни сақлаш вазирлиги ахборот хизмати раҳбари Фурқат Санаев билан ҳам боғланиб, ҳолатга аниқлик киритишга уринди. Бироқ Санаев ҳар доимгидек қўнғироқларга жавоб бермади. Электрон тарзда юборилган сўровни эътибордан четда қолдирди.
Мавзуга доир:
- Қашқадарёда «Док-1 Макс» сиропини истеъмол қилган 1,5 ёшли бола вафот этди
- «Мазкур маълумотни вилоят тиббиёт ходимлари вазирликдан яширган» — Беҳзод Мусаев
- ДХХ «Док-1 Макс» препарати билан боғлиқ ҳолат юзасидан жиноят иши қўзғатди
- Соғлиқни сақлаш вазирлиги «Док-1 Макс» препаратини ўрганиш натижаларини эълон қилди
- Самарқандда «Док-1 Макс» препаратидан 18 нафар бола вафот этгани маълум бўлди
Изоҳ (0)