«Новий очаг» нашри терининг янгилиги ва эластиклигини тиклашга, қариш жараёнини секинлаштиришга ёрдам берадиган бир нечта одатларни санаб ўтди.
Нима учун қаришга қарши косметика ушбу жараённи секинлаштиришга ёрдам бермайди?
Ҳақиқий ёшга нисбатан ёшроқ кўриниш ва табиий қаришга қаршилик кўрсатиш учун уйқу, овқатланиш ва, албатта, турмуш тарзини назорат қилиш керак. Афсуски, агар инсон сурункали равишда етарлича ухламаса, доим асабийлашса ёки нотўғри овқатланса, қаришга қарши ҳеч қандай косметик маҳсулот ёрдам бера олмайди.
Аммо яхши хабар шундаки, агар қуйидаги олтита оддий одат ҳамиша амалга оширилса, кўп йиллар давомида ёш кўринишни сақлаб қолиш мумкин.
Ичкаридан бошланг
Тўғри овқатланиш, етарли миқдорда сув, зарур витамин ва минералларни мунтазам равишда истеъмол қилиш ташқи кўринишга дарҳол таъсир қилади — албатта, яхши томонга. Кун давомида етарли миқдорда сув ичиш, соғлом ёғларга бой маҳсулотлар истеъмол қилиш, туз ва шакарни камайтириш — бу нафақат терига, балки бутун организм тизимларига фойда келтирадиган оддий одатдир.
Стрессни унутинг
Стресс пайтида ажралиб чиқадиган гормонлар қариш сабабларидан бири бўлган эркин радикалларга қарши ҳимояни йўқ қилади. Албатта, ҳеч бир инсон стрессдан бутунлай халос бўла олмайди, лекин ҳеч бўлмаганда оқибатларни минималлаштириш мумкин: медитацияни ўрганиш ва буни мунтазам равишда бажариш, тоза ҳавода тез-тез юриш, сузиш ва табиатда кўпроқ вақт ўтказиш тавсия этилади.
Дерматологга мунтазам ташриф буюринг
Мутахассис сизнинг терингизга нима кераклигини тез ва осон аниқлай олади. Қолаверса, самарали бўлган усулларни маслаҳат беради. Эҳтимол, чуқур намланиш ёки тўғри овқатланиш тери учун муҳимдир ёки махсус процедуралар вақти келган бўлиши мумкин. Ҳар қандай ҳолатда ҳам маълум бир ёшдан кейин ёш терини профессионал равишда сақлаб қолиш учун косметологга мунтазам равишда ташриф буюриш керак.
Витаминлар қабул қилинг
Аввало, C ва Э витаминлари табиий ва жуда кучли антиоксидантлардир. Шундай қилиб, C витамини барча қаришга қарши маҳсулотлар таркибига киради — бу коллагеннинг муҳим қисми, терининг эластиклиги учун жавоб берадиган оқсилдир. Э витамини терининг ёшлиги ва эластиклигини сақлаш учун зарур бўлган муҳим моддаларни ишлаб чиқаришда ҳам иштирок этади.
Чекишни ташланг
Бу арзимасдек туйилиши мумкин, лекин ҳақиқат: ҳеч қандай зарарли одат терига чекиш каби ёмон таъсир қилмайди. Никотин тери ҳужайраларида кислород етишмаслигига олиб келади, бу эса юз рангининг ёмонлашишига, эластикликни йўқолишига ва ажинлар пайдо бўлишига сабаб бўлади.
Етарлича ухланг
Гап шундаки, уйқусиз тундан кейин яхши кўриниш қийин: ухлаш вақтида организм, гормонал мувозанат, ҳужайралар, шу жумладан тери ҳужайралари қайта тикланади. Сифатли уйқу тери ҳужайраларида қон айланишини яхшилайди, шишдан халос бўлишга ёрдам беради ва қариш билан курашадиган антиоксидантлар ишлаб чиқаришни рағбатлантиради.
Изоҳ (0)