Украинада россиялик олигарх Алишер Усмонов компаниясига тегишли бўлган темир рудаси партияси ҳибсга олинди. Бу ҳақда Украина хавфсизлик хизмати хабар берди.
Хатловга олинган мулк деярли 2 миллиард гривнага (54 млн 350 минг доллар) баҳоланмоқда.
«Тергов ва тезкор тадбирлар натижасида Молиявий тергов хизмати ходимлари билан биргаликда 160 минг тоннадан ортиқ Украина темир рудаси сақланган Россия ерости омборлари аниқланди. Яширин хом ашё Украинанинг бир нечта денгиз портлари ҳудудида топилди. Ҳибсга олинган фойдали қазилмаларнинг умумий қиймати тахминан 2 миллиард гривнани ташкил қилади. Аниқланишича, топилган темир рудаси россиялик олигарх, Кремль олий ҳарбий-сиёсий раҳбариятининг яқин доирасига мансуб Алишер Усмонов компаниясига тегишли», дейилади хабарда.
Таъкидланишича, хом ашёни ноқонуний равишда денгиз орқали Россия ҳудудига олиб ўтишга, сўнгра уларни металлургия саноати ва Россия ҳарбий-саноат комплекси эҳтиёжларига ўтказишга уриниш бўлган.
Бироқ мулк ҳибсга олинган, уни Коррупция ва бошқа жиноятлардан олинган мол-мулкни аниқлаш, қидириш ва бошқариш миллий агентлигига ўтказиш масаласи кўриб чиқилмоқда.
Изоҳ (0)