Америкалик тадбиркор Илон Маск Россия Хавфсизлик кенгаши раиси ўринбосари Дмитрий Медведев томонидан эълон қилинган 2023 йилги ўнта прогнозни ўзи шу пайтгача эшитган энг бемаъни башорат деб атади. Бу ҳақда Маск Медведевнинг Twitter’даги пости остига ёзди.
Дастлаб Маск ушбу прогнозларни «эпик» деб атаган ва бир йилдан кейин улар ҳақида эслатишни сўраган.
«Бу, шубҳасиз, мен эшитган энг бемаъни прогнозлар, улар сунъий интеллект ва барқарор энергия тараққиётидан бехабарликни кўрсатади», — деб ёзади Маск.
26 декабрь куни Дмитрий Медведев келаси йил нималар содир бўлиши юзасидан ўзининг «футуристик фаразлари» билан бўлишди. Хусусан, у 2023 йилда нефть ва газ нархининг қанчага ошишини, Евроиттифоқ парчаланиб кетишини ва АҚШда фуқаролар уруши бошланишини, АҚШ президентлигига сайловларда Илон Маскнинг ғалабасини тахмин қилган. Пости якунида эса Медведев «Барчангизга, англ-саксон дўстлар ва уларнинг шодлик билан хуриллаётган чўчқаларига салом!» деб ёзган.
Ундан аввал Медведев «Российская газета»да «Бизнинг халқимиз, еримиз, ҳақиқатимиз» номли мақоласини чоп эттирган ва унда 6 банд билан 2022 йил якунларини сарҳисоб қилган. У Украинанинг амалдаги расмийлари билан тинчлик музокараларини рад этган ва давом этаётган ядровий таҳдид ҳақида гапирган. Аммо у «охирзамон ҳали келмайди», деб ишонтирган.
Изоҳ (0)