Ҳиндистонда леопард одамларга ҳужум қилди: 15 киши яраланди (видео)

Ҳиндистоннинг Ассам штатида леопарднинг ҳужуми оқибатида камида 15 киши жароҳат олди. Бу ҳақда Times оф India хабар берди.

Ярадорлар орасида ўрмон хўжалиги ходимлари, болалар ва аёллар бор, уларнинг кўпчилиги леопарднинг тишлаши оқибатида жароҳат олган.

“Улар касалхонага ётқизилмоқда, соғлиғи хавф остида эмас. Аммо Жорҳат тиббиёт коллежи касалхонасига келаётган ярадорлар сони ошмоқда”, — дейди шифохона матбуот котиби Пурнима Баруа.

Ярадорларнинг аксарияти шифохонага Жорхат шаҳри чеккасида жойлашган Ёмғир ўрмонлари илмий-тадқиқот институти кампусидан етиб келган. Ўрмон департаменти ходимларининг айтишича, ҳайвон яқин атрофдаги Гиббон ёввойи табиат қўриқхонасидан озиқ-овқат излаб кампусга бостириб кирган.

Таъкидланишича, леопард тунда чой плантациялари билан ўралган институтга туташ қишлоқлар аҳолисига ҳужум қилган.

“Ҳайвон жуда агрессив эди. Уни қўлга олиш учун кампус ичида тузоқлар ўрнатдик. Леопардни қидиришга ҳаракат қилмоқдамиз”, — дейди шаҳар матбуот котиби. Аҳолига уйда қолиш тавсия қилинган.