Швеция ва Финляндия 2023 йил охиригача НАТОга аъзо бўлади. Бу ҳақда Шимолий Атлантика альянси бош котиби Йенс Столтенберг маълум қилди.
У ратификация жараёни ўз вақтида якунланишига мутлақо ишонишини қўшимча қилди.
Шу билан бирга, НАТО бош котиби аниқ саналарни айтмади, бироқ унинг фикрича, Туркия жараёнга узоқ вақт тўсқинлик қилмайди ва бу икки мамлакатнинг НАТОга қўшилиш протоколларини ратификация қилади.
Швеция Ташқи ишлар вазири Тобиас Биллстрём 21—22 декабрь кунлари Анқарага ташриф буюриб, Туркия ташқи ишлар вазири Мевлут Чавушўғли билан учрашганди.
Эслатиб ўтамиз, 19 декабрь куни Швеция Олий суди журналист Булент Кенеснинг Туркияга экстрадициясини тўхтатган. Чавушўғли бу қарорни «ўта салбий» деб атаган.
Журналист ва Курд ишчилар партиясига алоқадор шахсларнинг экстрадиция қилиниши Швециянинг НАТОга аъзо бўлишини тасдиқлаш бўйича Туркия талабларидан бири. Чавушўғли Биллстрём билан ўтказган матбуот анжуманида «Швеция келишувларнинг ҳали ярмини ҳам амалга оширмаган»ини айтди.
Ноябрь ойида Туркия президенти Ражаб Тоййиб Эрдўғон унинг мамлакати Финляндия ва Швециянинг НАТОга расмий аъзо бўлишини икки давлатдан зарур «қадамлар»ни кўрмагунча маъқулламаслигини айтган эди.
Финляндия ва Швеция НАТОга қўшилиш учун қачон ариза берган?
18 май куни Финляндия ва Швеция Украинадаги жанговар ҳаракатлар авж олган бир пайтда НАТОга қўшилиш учун ариза берган. Туркия Хелсинки ва Стокгольмни мамлакатда тақиқланган Курдистон Ишчилар партияси билан ҳамкорликда айблаб, уларнинг альянсга қўшилишга бир муддат тўсқинлик қилди.
Швеция ва Финляндия НАТО блокига қўшилиши учун альянсга аъзо бўлган 30 та мамлакатнинг барчаси тегишли битимни ратификация қилиши керак.
Швеция ва Финляндиянинг НАТОга аъзо бўлишини ратификация қилиш жараёни 5 июль куни бошланган. Уларнинг НАТОга қўшилишини альянснинг 30 та аъзосидан 28 таси ратификация қилди.
Изоҳ (0)