Жанубий Корея президенти Юн Сок Ёл 2020 йилда судланиб, 17 йилга қамалган собиқ давлат раҳбари Ли Мён Бакни афв этди, деб хабар бермоқда «Рёнхап» агентлиги.
Афв ҳақидаги қарор 28 декабрь куни кучга киради. Шу билан бирга, 81 ёшли собиқ президентга 2028 йил майига қадар давлат лавозимларини эгаллаш тақиқланади.
Ли Мён Бак 2008—2013 йилларда президент бўлган. У маблағларни ўзлаштириб олгани ва ўта йирик миқдорда пора олгани учун қамоққа ҳукм қилинганди. Шунингдек, унга қарийб 15,7 миллион доллар жарима тўлаш мажбурияти ҳам юкланганди.
Ундан аввалроқ, 2018 йилда ҳам коррупция учун 15 йиллик қамоққа ҳукм қилинган эди, бироқ ўшанда унинг соғлиғи ёмонлашгани туфайли, гаров эвазига озод этишга қарор қилишганди.
2021 йил декабрида Жанубий Кореянинг яна бир собиқ президенти Пак Кин Хе афв этилганди. 2018 йилда Пак Кин Хе давлат сирини ошкор этиш, тамагирлик, ваколатини суиистеъмол қилиш ва пора олишда айбланиб, 24 йил муддатда озодликдан маҳрум этилган ва унга нисбатан 18 миллиард вон (ўша вақтдаги курс бўйича 17,5 миллион доллар) жарима белгиланган эди.
Изоҳ (0)