Қозоғистон президенти Қосим-Жўмарт Тўқаев аёлларнинг пенсия ёшини «музлатиб қўйиш» тўғрисидаги қонунни имзолади. Бу ҳақда Акорда хабар берди.
Тўқаев «Қозоғистоннинг айрим қонун ҳужжатларига ёшларга оид давлат сиёсати ва ижтимоий таъминот масалалари бўйича ўзгартиш ва қўшимчалар киритиш тўғрисида»ги қонунини имзолаган. Қабул қилинган ўзгартиришларга кўра, аёлларнинг пенсия ёши 2028 йилгача 61 ёш этиб белгиланади.
Бундан ташқари, бола парвариши учун тўловлар муддати 1,5 йилгача оширилмоқда. Энг кам базавий пенсия миқдорини эса яшаш минимумининг 70 фоизигача, максимал базавий пенсия миқдорини эса яшаш минимумининг 120 фоизигача ошириш кўриб чиқилмоқда.
Ҳужжатга, шунингдек, ёшларнинг ёшини 29 ёшдан 35 ёшгача ошириш, маҳаллий ижро ҳокимияти органларига ёшларни имтиёзли ижарага бериладиган уй-жой билан таъминлаш дастурларини ишлаб чиқиш ва амалга ошириш ҳуқуқини берувчи ўзгартиришлар киритилган.
Изоҳ (0)