«Чеченистондан ўрнак». Россияда ҳарбийларни тайёрлашнинг янги усули таклиф қилинди

Россияда Чеченистон мисолида мамлакат бўйлаб ҳарбий тайёргарлик марказларини очиш таклиф қилинди. Бундай ташаббус билан Кремль вакиллари Россия президенти Владимир Путинга мурожаат қилди.

Марказларни очишни Россия Бош вазири ўринбосари, Россия президентининг Узоқ Шарқ федерал округидаги ваколатли вакили Юрий Трутнев ва Россия президенти маъмурияти раҳбарининг биринчи ўринбосари Сергей Кириенко таклиф қилган. Жангчиларни тайёрлаш марказлари Чеченистоннинг Гудермесдаги Россия махсус кучлари университетига ўхшаш тарзда ташкил этилади.

«Кириенко ва мен Владимир Путинга йигитларни тайёрлаш учун шу каби ўқув марказларини яратиш таклифи билан мурожаат қилдик. Гудермесда бундай ишлар амалга оширилган, у бугунги кунда нафақат Чеченистон, балки Россиянинг салмоқчи қисми учун ҳам ўқув марказига айланди. Биргаликда бу ишни давом эттирамиз, бошқа ҳудудларда марказлар ташкил қиламиз», — деди Трутнев.

Унга кўра, марказлар Гудермесдаги Россия махсус кучлари университети асосчиларидан бири Даниил Мартинов ёрдамида яратилади.

«Бу марказларнинг вазифаси жуда оддий бўлиб, Россия янада кучли бўлиши ва имкон қадар тезроқ ғалаба қозонишига қаратилган», — деб тушунтирди Трутнев.

Маълумот ўрнида, Россия олий ўқув юртларида «Ҳарбий тайёргарлик асослари» курси пайдо бўлади. Курс бакалавриат ва мутахассислик таълим дастурларига киритилади. Талабалар Россиянинг ижтимоий-иқтисодий, сиёсий ва ҳарбий-техник ривожланишининг асосий йўналишларини, халқаро муносабатларнинг хусусиятларини ўрганади.