Афғонистон муваққат ҳукуматидаги ташқи ишлар вазири Амирхон Муттакий «Толибон» Покистонни мусулмон биродар деб билишини айтиб, бу давлатни ҳам шундай муносабатда бўлишга чақирди. Бу ҳақда Hasht-e Subh Daily хабар берди.
Муттакийнинг баёноти «Толибон» ва Покистон чегарачилари ўртасида бўлиб ўтган тўқнашув фонида янграган. У Дуранд чизиғидаги кескинликдан ҳеч ким манфаатдор эмаслиги ва Покистон Афғонистон билан ўзаро алоқада бўлиши кераклигини айтди.
«Биз яқин қўшнимизни Дуранд чизиғи бўйлаб кескинлик ҳеч кимга манфаатдор эмаслиги ҳақида огоҳлантирмоқдамиз», — деди Муттакий.
Шунингдек, у босим иш бермаётганини айтиб, муаммоларни ҳал қилиш учун дунёни «Толибон»ни тушунишга чақирган. Покистон «Толибон»ни бир неча бор «Теҳрик-э-Толибон Покистон»ни қўллаб-қувватлашда айблаган ва уларга Афғонистонда хавфсиз бошпана берганини билдирганди.
Эслатиб ўтамиз, 15 декабрь куни Қандаҳорнинг Спинболдек шаҳрида «Толибон» ва Покистон кучлари тўқнашди. Манбаларга кўра, можаро «Толибон» бу ҳудудда назорат-ўтказиш пункти ўрнатмоқчи бўлганидан кейин бошланган. Аммо Покистон ҳарбийлари бунга қаршилик қилган. Ҳодиса оқибатида 1 киши ҳалок бўлгани, 15 киши эса яралангани айтилмоқда. Покистон «Толибон» артиллериядан тинч аҳолига қарата ўқ узгани акс этган видеони эълон қилган.
Ҳодисада «Толибон» Покистонни айблаб, муаммони мулоқот йўли билан ҳал қилишга чақирган. Покистон сенатори эса тўқнашувда қарши томонни айблаб, ҳукуматдан «Толибон»га нисабатан сиёсатни ўзгартиришни сўраган.
«‘Толибонъдан бундай муносабатни кутмаган эдик, улар бизга раҳмат ўрнига қурол билан жавоб беришди. Биз Ғарб иродасига қарши Афғонистоннинг (‘Толибон‘) дунёдаги вакили сифатида ҳаракат қиляпмиз. Улар эса, аксинча, бизга қарши қурол кўтарди, бу жуда ачинарли», — деган сенатор.
Изоҳ (0)