Ўзбекистонга қўшни мамлакатлар Қирғизистон ва Қозоғистонда, шунингдек, Россияда аҳоли орасида чўчқа гриппи қайд этилди. Ушбу касаллик Ўзбекистонга кириб келишининг олдини олиш борасида қандай ишлар амалга оширилаётгани юзасидан «Дарё» мухбири Ветеринария илмий тадқиқот институти директори Бозорбой Элмуродовдан изоҳ олди.
«Ўзбекистоннинг чегара ёки буфер зоналарида ушбу касалликнинг олдини олиш ва ташхис қўйиш имкониятимиз етарли. Институтимизнинг 17 та замонавий лабораторияси мавжуд. Мазкур касаллик бўладими ёки ҳайвонларда учрайдиган бошқа касалликларни тез аниқлаш бўйича тажрибамиз бор», — деди Бозорбой Элмуродов.
Олимнинг алоҳида таъкидлашича, республиканинг чегара ҳудудларида мазкур касалликка қарши вакциналаш жараёнлари ўтказилган.
«Ветеринария ва чорвачиликни ривожлантириш давлат қўмитаси томонидан ҳайвонларда чўчқа гриппига қарши курашиш учун дори воситалари ва вакциналар етарлича захираси берилган», — деди у.
Ўзбекистонда чўчқа гриппи қайд этилмади
Санитария-эпидемиологик осойишталик ва жамоат саломатлиги хизматининг «Дарё»га маълум қилишича, Ўзбекистонда жорий йилнинг ўтган даврида чўчқа гриппи қайд этилмаган. Хизмат мазкур касалликнинг олдини олиш борасида амалга оширилаётган ишлар юзасидан тушунтириш берди:
Чўчқа гриппига шубҳа қилиш учун белгилар билан биргаликда беморнинг касаллик тарқалган ҳудудларда бўлиши ва ушбу касалликка чалинганлар билан касаллик бошланишидан камида 7 кун олдин мулоқотда бўлган бўлиши эътиборга олиниши керак.
Оддий гриппдан фарқли томонлари: одамлар орасида чўчқа гриппи инфекциясининг одатдаги клиник кўриниши мавсумий грипп ва бошқа ўткир юқори нафас йўлларининг инфекцияларига ўхшаш бўлиб, ҳароратнинг кўтарилиши ва нафас олиш тизимида яллиғланиш белгиларининг юзага келиб, йўтал, ангина, фарингит, бурун битиши каби белгиларнинг пайдо бўлишидир. Айрим ҳолатларда қусиш ва ич кетиш аломатлари юзага келиши мумкин. Одамлар одатда чўчқа гриппини касалланган чўчқалардан юқтиришади, баъзи ҳолларда одамдан одамга юқиш кузатилган, аммо бу касал одамлар билан яқин алоқада бўлган одамлар ва одамлар гуруҳлари билан чекланган.
Касаллик фақат махсус лаборатор текшириш усуллари билан тасдиқланади.
Чўчқа гриппига чалинган беморлар дарҳол юқумли касалликлар касалхонасида махсус ташкил этилган госпиталга, гумон қилинганлар бўлса, провизор госпиталга, мулоқотда бўлганлар эса изоляторга ётқизилади. Бемор тўлиқ тузалгунча даволанади, алоҳидаланиб (изоляция), тиббий кузатув остига олинади.
Чўчқа гриппи учун мавсумийлик хос бўлиб, асосан куз ва қиш ойларида кўп тарқалади.
Ўзбекистонда ҳам вирусологик тадқиқотлар айни кунларда грипп ва гриппга ўхшаш беморлардан 2022 йил 11 ойда жами 1360 та олинган намуналарда ўтказилган таҳлилларда чўчқа гриппи қўзғатувчилари топилмаган.
Чўчқа гриппининг касалланиш белгилари ва кечиши бошқа грипп қўзғатувчилари билан бир хиллиги ва унинг юқиш йўли, тарқалиши ва мойилликнинг бир хиллиги айнан ушбу касалликнинг профилактикасида ҳам анъанавий тадбирларни қўллашга имкон беради ва мамлакатимизда ушбу касаллик юзага келган тақдирда, уни жиловлаш ва бартараф қилиш учун тайёргарлик етарли.
Республика бўйича амалга оширилаётган профилактик ва эпидемияга қарши самарали тадбирлар натижасида ўлат, вабо, сариқ иситма, вирусли геморрагик иситмалар, парранда гриппи каби карантин ва ўта хавфли юқумли касалликлар қаторида чўчқа гриппи ҳам республика ҳудудига четдан кириб келиши ва аҳоли ўртасида тарқалиб кетишига йўл қўйилмади.
Касалликлар четдан кириб келишининг олдини олиш мақсадида республика бўйича давлат чегараларини кесиш жойларида 54 та санитария-карантин пунктлари (кейинги ўринларда – СКП деб юритилади) ташкил этилиб, бугунги кунда 44та СКП фаолият олиб бормоқда.
Санитария-карантин пунктларининг барчаси масофадан тана ҳароратини ўлчовчи тепловизорлар, контактсиз пирометрлар, электрон термометрлар, шунингдек, шахсий ҳимоя воситалари билан таъминланди.
Чегарадан ўтаётган ҳар бир фуқароларнинг тана ҳароратлари масофадан тепловизорлар ёрдамида ўлчанмоқда. Касалликка гумон қилинган фуқаролар тўлиқ тиббий-санитария кўригидан ўтказилиб, тез ёрдам келгунга қадар СКПдаги изоляторга алоҳидалаш ишлари олиб борилмоқда.
Изоҳ (0)