«Сабримиз чексиз эмас» — Эрон Зеленскийни огоҳлантирди

Эрон Ташқи ишлар вазирлиги Украина президенти Владимир Зеленскийнинг АҚШ Конгрессидаги нутқини танқид қилди. Бу  ҳақда Times of Israel хабар берди.

Танқидга Зеленский Украинага қарши урушда фойдаланиш учун Эрон Россияга дронлар етказиб бераётгани ҳақида гапиргани сабаб бўлган.

«Геноцид сиёсатида Россия ўзига иттифоқчи топди: Эрон. Россияга юборилган юзлаб  Эрон дронлари бизнинг муҳим инфратузилмамиз учун таҳдидга айланди. Шу тариқа бир террорчи иккинчисини топди. Агар биз уларни ҳозир тўхтатмасак, бошқа иттифоқчиларингизга зарба беришлари вақт масаласи. Биз буни қилишимиз керак», — деган Зеленский ўз нутқида.

Эрон ТИВ Зеленскийнинг «Эрон Ислом Республикасига нисбатан такрорий айбловлари ва қўпол сўзлари»ни қоралаб баёнот берди. Унда «Эрон Украинадаги урушда фойдаланиш учун ҳеч бир томонга ҳарбий техника етказиб бермагани» таъкидланади.

Вазирлик доим барча мамлакатлар, жумладан, Украинанинг ҳудудий яхлитлигини ҳурмат қилганини билдириб, «Зеленский Эроннинг бу каби асоссиз айбловларга нисбатан стратегик сабри чексиз эмаслигини билишини» қайд этди.

Сентябрь ойида Украина Эронда ишлаб чиқарилган учувчисиз учоқлардан фойдаланган ҳолда Россия ҳужумлар қилганини хабар берган. Эрон ташқи ишлар вазири Ҳусайн Амир-Абдуллоҳийян Россияга учувчисиз самолётлар юборилганини тан олиб, етказиб бериш уруш бошланишидан олдин амалга оширилганини айтган. Бундан олдин Эрон расмийлари Россияга учувчисиз самолётлар юборилганини рад этганди.