КХДР анчадан буён Россияга ҳеч қандай қурол-яроғ етказмаяпти ва бунга урингани ҳам йўқ. АҚШ Миллий хавфсизлик кенгаши вакили Жон Кирбининг бундай етказмалар ҳақидаги гаплари уйдирма, деди «Вагнер» хусусий ҳарбий компанияси асосчиси, бизнесмен Евгений Пригожин.
Шу билан бирга, Пригожин қайд этишича, «Вагнер» гуруҳи «етарлича кўп миқдорда» Америка қурол-яроғларини сотиб олади ва унинг ҳуқуқшунослари АҚШнинг «Вагнер»га қурол етказиб беришга нисбатан чекловлари бекор қилинишига эришади.
«Биз бу чекловларни мутлақо адолатсиз деб ҳисоблаймиз, чунки ‘Вагнер’ Америка қурол-яроғларини сотиб олишда бирор марта халқаро савдо қоидаларини бузмаган», — дея ишонтирди у.
Шунингдек, Шимолий Корея Ташқи ишлар вазирлиги ҳам баёнот эълон қилиб, КХДР Россия қурол етказиб бермаётгани, Москва «бошқаларнинг ёрдамисиз ҳам» ўзини ҳимоя қилишга қодирлигини айтди.
«Республикамизнинг КХДР ва Россия ўртасидаги ‘қурол битимлариъга оид мавжуда бўлмаган масала юзасидан принципиал позицияси ўзгармасдир», — дейилади ТИВ хабарида.
Пхеньян халқаро ҳамжамиятни КХДР ва Россиянинг ҳарбий ҳамкорлиги ҳақидаги асоссиз хабарларга қулоқ солмасдан, Украинага қурол-яроғ етказиб бераётган «АҚШнинг жиноий ҳаракатларига эътибор қаратишга» чақирди.
Аввалроқ Reuters агентлиги АҚШнинг юқори мартабали мулозимига таяниб, Россиянинг «Вагнер» гуруҳи Шимолий Кореядан қурол-яроғ сотиб олганини маълум қилганди. Манбанинг таъкидлашича, «Вагнер» хусусий ҳарбий компаниясининг Украинадаги урушдаги роли ортиб бормоқда. Кремль томонидан назорат қилинадиган ҳарбий компания янги қуроллар учун пул тўлаган, хусусан, КХДР вагнерчиларга ракета ва снарядлар юборган.
Ноябрь ойида Шимолий Корея Россияга ҳеч қачон қурол экспорт қилмагани ва бундай қилишни режалаштирмаётгани ҳақида маълум қилганди. КХДР Россияда ўқ-дорилар тақчиллиги шароитида унга артиллерия снарядларини яширинча етказиб бераётганини Оқ уй Миллий хавфсизлик кенгашининг стратегик алоқалар бўйича координатори Жон Кирби айтганди.
«Вагнер» гуруҳи ўзи қандай гуруҳ?
Кўплаб Ғарб ОАВлари «Вагнер» гуруҳи тўғридан-тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.«Konkord» компанияси эгаси бўлган Евгений Пригожин 2016 йилдан буён АҚШ, 2020 йилдан буён эса Евроиттифоқ санкциялари остидадир. Вашингтонда у Интернет тадқиқотлари агентлиги (троллар фабрикаси) ва «Вагнер»ни назорат қилишда айбланган.
У «Вагнер»га алоқадорлигини кўп марта рад этган ва бундай айбловлар сабабли судлашган, аммо 2022 йил сентябрида у «Вагнер» асосчиси эканини маълум қилди. Ташкилотни 2014 йилда, унинг сўзларига кўра, «Донбассда рус халқига нисбатан геноцид» бошланган вақтда тузган.
Изоҳ (0)