KXDR anchadan buyon Rossiyaga hech qanday qurol-yarog‘ yetkazmayapti va bunga uringani ham yo‘q. AQSH Milliy xavfsizlik kengashi vakili Jon Kirbining bunday yetkazmalar haqidagi gaplari uydirma, dedi “Vagner” xususiy harbiy kompaniyasi asoschisi, biznesmen Yevgeniy Prigojin.
Shu bilan birga, Prigojin qayd etishicha, “Vagner” guruhi “yetarlicha ko‘p miqdorda” Amerika qurol-yarog‘larini sotib oladi va uning huquqshunoslari AQSHning “Vagner”ga qurol yetkazib berishga nisbatan cheklovlari bekor qilinishiga erishadi.
“Biz bu cheklovlarni mutlaqo adolatsiz deb hisoblaymiz, chunki ‘Vagner’ Amerika qurol-yarog‘larini sotib olishda biror marta xalqaro savdo qoidalarini buzmagan”, — deya ishontirdi u.
Shuningdek, Shimoliy Koreya Tashqi ishlar vazirligi ham bayonot e’lon qilib, KXDR Rossiya qurol yetkazib bermayotgani, Moskva “boshqalarning yordamisiz ham” o‘zini himoya qilishga qodirligini aytdi.
“Respublikamizning KXDR va Rossiya o‘rtasidagi ‘qurol bitimlari’ga oid mavjuda bo‘lmagan masala yuzasidan prinsipial pozitsiyasi o‘zgarmasdir”, — deyiladi TIV xabarida.
Pxenyan xalqaro hamjamiyatni KXDR va Rossiyaning harbiy hamkorligi haqidagi asossiz xabarlarga quloq solmasdan, Ukrainaga qurol-yarog‘ yetkazib berayotgan “AQSHning jinoiy harakatlariga e’tibor qaratishga” chaqirdi.
Avvalroq Reuters agentligi AQSHning yuqori martabali mulozimiga tayanib, Rossiyaning “Vagner” guruhi Shimoliy Koreyadan qurol-yarog‘ sotib olganini ma’lum qilgandi. Manbaning ta’kidlashicha, “Vagner” xususiy harbiy kompaniyasining Ukrainadagi urushdagi roli ortib bormoqda. Kreml tomonidan nazorat qilinadigan harbiy kompaniya yangi qurollar uchun pul to‘lagan, xususan, KXDR vagnerchilarga raketa va snaryadlar yuborgan.
Noyabr oyida Shimoliy Koreya Rossiyaga hech qachon qurol eksport qilmagani va bunday qilishni rejalashtirmayotgani haqida ma’lum qilgandi. KXDR Rossiyada o‘q-dorilar taqchilligi sharoitida unga artilleriya snaryadlarini yashirincha yetkazib berayotganini Oq uy Milliy xavfsizlik kengashining strategik aloqalar bo‘yicha koordinatori Jon Kirbi aytgandi.
“Vagner” guruhi o‘zi qanday guruh?
Ko‘plab G‘arb OAVlari “Vagner” guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.“Konkord” kompaniyasi egasi bo‘lgan Yevgeniy Prigojin 2016-yildan buyon AQSH, 2020-yildan buyon esa Yevroittifoq sanksiyalari ostidadir. Vashingtonda u Internet tadqiqotlari agentligi (trollar fabrikasi) va “Vagner”ni nazorat qilishda ayblangan.
U “Vagner”ga aloqadorligini ko‘p marta rad etgan va bunday ayblovlar sababli sudlashgan, ammo 2022-yil sentabrida u “Vagner” asoschisi ekanini ma’lum qildi. Tashkilotni 2014-yilda, uning so‘zlariga ko‘ra, “Donbassda rus xalqiga nisbatan genotsid” boshlangan vaqtda tuzgan.
Izoh (0)