Россия президенти Владимир Путин Украинадаги урушни тезроқ тугатиш тарафдори эканини айтди. Бу ҳақда «Интерфакс» хабар берди.
«Бизнинг мақсадимиз ҳарбий можаронинг ғилдирагини айлантириш эмас, аксинча урушни тугатиш. Бунга интиламиз ва бундан кейин ҳам ҳаракат қиламиз. Бунинг бажарилиши қанча тез бўлса, шунча яхши», — деди Россия раҳбари.
У Россия Украина билан тинчлик музокараларини рад этмаслигини қайд этди. Жанговар ҳаракатларнинг бориши ҳақида гапирар экан, Путин «жанговар ҳаракатларнинг кучайиши асоссиз йўқотишларга олиб келиши»ни таъкидлади.
Бундан ташқари, у Москва АҚШнинг Украинага Patriot тизимини етказиб бераётганини инобатга олиши, бу қуролга қарши восита топилишига ишонтирди.
«Patriot’га келсак, бу жуда эски тизим, айтайлик, бизнинг С-300 каби ишламайди. Аммо, шунга қарамай, бизга қарши бўлганлар бу мудофаа қуроли эканини билади. Шунчаки буни инобатга оламиз», — дейди Россия раҳбари.
Путин Америка ҳаво ҳужумидан мудофаа тизимларини етказиб бериши Украинадаги можарони узайтиришини айтди. «Бу ишни беҳуда қилишяпти. Бу фақат можарони узайтириш, тамом», — деди у ва Россия Украина билан музокаралардан бош тортмаганини қўшимча қилди.
«Барча қуролли тўқнашувлар у ёки бу тарзда дипломатик йўлдаги қандайдир музокаралар билан тугайди. Ҳеч қачон музокарани рад этганимиз йўқ. Украина раҳбарияти музокара олиб боришни ўзига ман қилган.
Шундай бўлса-да, эртами-кечми, албатта, зиддиятли вазиятда бўлган ҳар қандай томонлар ўтириб, келишиб олади. Бу бизга қарши чиққанларга қанчалик тез етиб борса, шунча яхши», — деди у.
Мавзуга доир:
Изоҳ (0)