Шавкат Мирзиёев 21 декабрь куни «Тадбиркорлик субъектларининг экспорт фаолиятини қўллаб-қувватлашнинг қўшимча чора-тадбирлари тўғрисида»ги фармонни имзолади.
Мазкур фармон билан экспортчи корхоналарни қўллаб-қувватлашнинг қўшимча чораларини жорий этиш назарда тутилмоқда. Хусусан, Экспортни рағбатлантириш агентлиги томонидан экспортолди молиялаштириш учун ажратиладиган ресурслардан берилган кредитларни ўз вақтида сўндириб келаётган тадбиркорлик субъектларига амалдаги кредитнинг сўндирилган қисмига мутаносиб равишда қўшимча кредитлар ажратиш имконияти яратилмоқда.
Амалдаги қонунчиликка мувофиқ, Экспортни рағбатлантириш агентлиги томонидан ажратиладиган молиявий ресурслар ҳисобидан берилган кредитни тўлиқ сўндирмаган экспорт қилувчига молиявий ресурслар ажратилмаслиги белгиланган. 2022 йилда агентлик томонидан экспортолди молиялаштириш учун республика миқёсида 234 та экспортчи корхонага 147 млн доллар миқдорида кредитлар ажратилган бўлиб, улар томонидан 444 млн долларлик маҳсулотлар экспорт қилинган.
Фармон билан, шунингдек, 2024 йил 1 январга қадар Европа, Туркия, Миср ва Марокаш давлатларига газлама ва трикотаж мато маҳсулотларини экспорт қилишда транспорт харажатларининг 70 фоизгача миқдорида компенсация қилишга субсидиялар тақдим этиш белгиланмоқда. 2022 йил январь ноябрь ойларида 133 млн долларлик, шундан Европа давлатларига 20 млн доллар, Туркияга 3 млн долларлик газлама экспорт қилинган.
Бундан ташқари, 2022 йил январь—ноябрь ойларида республикадан жами 46 минг тонна (260 млн доллар) трикотаж мато экспорт қилинган бўлиб, шундан Европа давлатларига 4,7 минг тонна (30 млн доллар) берилган. Ушбу давлатлар бозорларининг 5 фоизини эгаллаш учун зарур чоралар кўрилган тақдирда, маҳаллий корхоналар томонидан 900 млн долларлик газлама ва матоларни экспорт қилиш имкониятлари яратилади.
Фармонда пахта, кунгабоқар, маккажўхори ва соя ёғидан ташқари барча ўсимлик ёғларини экспорт қилишга рухсат берилмоқда. Президентнинг 2022 йил 31 майдаги «Истеъмол бозорларида нархлар барқарорлигини таъминлашга ва монополияга қарши чораларнинг таъсирчанлигини оширишга доир қўшимча чора-тадбирлар тўғрисида»ги фармонига асосан ўсимлик ёғи экспорти вақтинчалик тақиқланган эди.
Ховос туманида «Rs success agro» МЧЖ томонидан 182 млн евро инвестиция киритиш орқали 1,6 минг гектар қайта фойдаланишга топширилди, 1,3 минг гектарда томчилатиб суғориш тизими жорий қилинди ҳамда 120 минг тонна каннабис хом ашёсини қайта ишловчи мажмуа барпо этилди. Инвестиция шартномасига мувофиқ, ишлаб чиқарилган маҳсулотларнинг 50 фоизи экспорт қилиниши лозим.
Ушбу турдаги ўсимлик ёғлари республикада ноанъанавий ёғ маҳсулоти ҳисобланиши, ижтимоий аҳамиятга эга озиқ-овқат маҳсулотлари турига кирмаслигини ҳамда ушбу маҳсулотнинг экспорт қилиниши ички бозордаги ёғ маҳсулотлари нархига таъсир қилмаслигини инобатга олган ҳолда пахта, кунгабоқар маккажўхори ва соя ёғидан ташқари барча ўсимлик ёғлари экспортига рухсат берилмоқда.
Мавзуга доир:
Изоҳ (0)