Хоразм вилоятининг Урганч шаҳрида ИИБ ходимлари муз ёрилиб, каналга тушиб кетган фуқаро ҳаётини сақлаб қолди. Бу ҳақда вилоят ИИБ матбуот хизмати хабар берди.
Маълум қилинишича, 17 декабрь куни тунги соат 02:30 ларда «Хавфсиз ҳаёт» мобил иловаси орқали чақирув эълон қилинган. Шу яқин атрофда хизмат вазифасини ўтаётган Хоразм вилояти ИИБ ЖХХ ЖЦБ ППХ батальони 1-отряд ҳайдовчи ходими, кичик сержант Раззоқ Абдуллаев ҳамда 2-отряд сафдор ходими, сафдор Тоҳир Шамаков дарҳол мобил илова орқали чақирув юборган фуқаро билан боғланган.
У «Машъал» маҳалласи ҳудудидан ўтувчи Шовот каналида номаълум шахс муз ёрилиб кетиши оқибатида сувга тушиб кетгани, зудлик билан унга ёрдам берилмаса, ҳаёти хавф остида эканлигини айтган. Тезкор маълумотга эга бўлган ППХ батальони ходимлари зудлик билан ҳодиса жойига етиб бориб, каналдаги фуқарони сувдан олиб чиқиб, унга тез тиббий ёрдам кўрсатган.
Суриштирувлар давомида аниқланишича, Урганч туманида яшовчи ушбу фуқаро тўйдан маст ҳолда қайтаётган бўлган. Ярим тунда такси учрамагач, пиёда кетишга қарор қилган. Шаҳардаги Шовот канали кўпригидан ўтаётиб, муз устида юриб кўришга қарор қилган ва каналга тушиб, тўрт-беш қадам юргач, муз ёрилиб сувга тушиб кетган.
«Бахтимга каналнинг саёзроқ жойи экан. Шундай бўлса-да, бир зумда оёқларим лойга ботиб, ҳаракатланолмай қолдим. Бир неча бор қирғоққа чиқишга уриндим. Аммо тун совуғи туфайли тан-баданим бир зумда музлаб қолди. Вақт ўтган сайин оёқларим лойга ботиб, чўка бошладим», — дея воқеани сўзлаб берган жабрланган фуқаро.
Шундан сўнг ёрдам сўраб бақирган ва буни эшитган ўткинчи фуқаролардан бири ППХ батальони ходимларини чақирган.
Изоҳ (0)