Британиянинг The Economist нашри талқинига кўра, Украина йил мамлакатига айланди.
Нашр таҳририяти маълум қилишича, одатда йил мамлакатини танлаб олиш осон бўлмайди, бироқ бу йил ушбу мақом таъсис этилганидан буён биринчи марта «танлов очиқ-ойдин кўриниб турибди» ва «бу фақат Украина бўлиши мумкин».
«Одатда бундай шарафни, бизнинг фикримизча, ўтган 12 ой ичида энг катта яхшиланишга эришган мамлакат қўлга киритади. Шундай экан, Украина қандайдир маънода ноодатий танлов, чунки кўпчилик украиналикларнинг ҳаёти Путин уларнинг мамлакатига асоссиз бостириб кирганидан кейин сезиларли даражада ёмонлашди», — дейилади The Economist хабарида.
Айни вақтда эса Украина аҳолиси бу йил қаҳрамонлигини, уддабуронлигини ва собитлигини кўрсатган. «Украиналиклар ёлғонни фош қилиш мумкинлигини, террорга эса қарши туриш мумкинлигини намойиш этди. Уларнинг кураши якунланишига ҳали анча бор. Аммо 2022 йилда улар кўрсатган ўрнакка тенг келадигани бўлмади», — дейилади хабарда.
The Economist таҳририяти йил мамлакати мақомини 2013 йилда таъсис этди. Турли йилларда унга Мьянма, Франция, Арманистон сазовор бўлган. 2021 йилда эса Италия йил мамлакати деб эълон қилинганди.
Аввалроқ Американинг Time журнали ва Британиянинг Financial Times газетаси Украина президенти Владимир Зеленскийни йил одами деб эълон қилганди. Politico нашри эса уни 2022 йилда Европадаги энг таъсири кучли одам деб атаганди.
Изоҳ (0)