Оқ уй Украинага Америка аскарларининг юборилишини истисно қилди

АҚШ президенти Жо Байден Америка қўшинларини Украинага юбормайди, деди Оқ уйнинг юқори мартабали расмийси.

«У (Жо Байден) АҚШнинг Украинага россияликларга қарши тўғридан-тўғри жанг қилиши учун қўшин юбормаслиги ҳақида иккиланмаяпти ва эртага ҳам, бир ой ёки бир йилдан кейин ҳам иккиланмайди», — деди расмий. Бунинг ўрнига Қўшма Штатлар Украинага «ўн миллиардлаб долларлик» қурол ва жиҳозларни юбормоқда, дея эслатди у.

Украинада уруш бошланганидан сўнг, АҚШ расмийлари можаро зонасига ҳарбий хизматчиларни юбормаслигини бир неча бор таъкидлаган. Вашингтон Киевга қатор ҳарбий ёрдамлар юборди — Кил Жаҳон иқтисодиёти институти ҳисоб-китобларига кўра, 24 январдан 20 ноябргача бунинг миқдори тахминан 24 миллиард долларни ташкил этган.

Бугун, 21 декабрь куни Украина президенти Владимир Зеленский Вашингтонга жўнаб кетгани ҳақида хабар берилди. У АҚШ президенти билан учрашиб, низо зонасидаги стратегик вазиятни, санкцияларни ва Украинага кўмакни муҳокама қилади, шунингдек, Конгрессда нутқ сўзлайди.

Бундан ташқари, Оқ уй Украинага 2 миллиард долларлик янги ёрдам пакетини эълон қилди, унга Patriot ҳаво ҳужумига қарши мудофаа батареялари киради.