Хитой раҳбари Си Цзиньпин Россия Хавфсизлик кенгаши раиси ўринбосари, собиқ президент Дмитрий Медведев билан учрашди. Учрашув Пекиндаги Давлат уйида бўлиб ўтди. Медведев Си Цзиньпинга Россия президенти Владимир Путиннинг мурожаатини етказди.
«Хитой Коммунистик партияси Марказий қўмитаси бош котиби, Хитой Халқ республикаси раиси Си Цзиньпин билан музокаралар бўлиб ўтди. Биз икки ҳукмрон партия, Хитой Коммунистик партияси ва ‘Ягона Россия’ ўртасидаги ўзаро ҳамкорлик масалаларини муҳокама қилдик. Икки томонлама ҳамкорлик, барча соҳалардаги стратегик шериклигимиз, жумладан, албатта, саноат кооперацияси ва бошқа кўплаб масалаларни муҳокама қилдик. Биз халқаро вазиятни, жумладан, Украинадаги можарони муҳокама қилдик. Бу музокаралар жуда фойдали бўлди», — деди Дмитрий Медведев Telegram каналига жойлаган видеосида.
Шунингдек, у Хитой раҳбарига Владимир Путиннинг мурожаатини етказди, деб хабар қилди Хавфсизлик кенгаши раиси ўринбосари котибияти. Унга кўра, мурожаатда «Россия—Хитой сиёсий мулоқоти ва амалий ҳамкорлигининг мисли кўрилмаган даражаси» қайд этилган.
Си Цзиньпин Украинадаги можарони чўзиш ҳар икки томон учун ҳам фойдали бўлмаслигини айтганди. Ғарб давлатлари Хитойни ҳарбий можарони ҳал қилишда Россияга таъсир ўтказишга бир неча бор чақирган. «Ведомости» газетаси дипломатик манбага таяниб, Си Цзиньпин декабрь ойи охирида Владимир Путин билан учрашиши мумкинлиги ҳақида хабар берди. Хитой Ташқи ишлар вазирлиги икки давлат раҳбарларининг эҳтимолий учрашуви ҳақидаги саволга жавоб бермади.
Изоҳ (0)