2022 йилда Владимир Путиннинг Федерал Мажлисга мурожаати бўлмайди, у кейинги йилга кўчирилди, деб хабар берди «Коммерсантъ»га Россия президенти маъмуриятига яқин уч манба.
Нашр суҳбатдошларига кўра, ноябрь—декабрь ойларида маъмуриятда тадбирга «тайёргарлик» кўрилган, аммо кенг кўламли ишлар қилингани номаълум.
Россия президенти маъмуриятидаги вазиятдан яхши хабардор манба журналистлар билан суҳбатда, фронтдаги вазият аниқ бўлганидан кейингина президент парламентда нутқ сўзлагани маъқулроқ эканини айтди.
«Владимир Путиннинг мурожаати ҳар доим келажакнинг маълум бир тасвири билан боғлиқ», — деб тушунтирди бошқа суҳбатдош. Унинг қўшимча қилишича, мурожаатда, жумладан, Украинадаги уруш ҳақида гапириш керак, бу ҳақда эса прогноз қилиш қийин бўлмоқда.
Кейинроқ Россия президентининг матбуот котиби Дмитрий Песков журналистларга Путин 2022 йилда Федерал Мажлисга мурожаат йўлламаслигини тасдиқлади.
Охирги марта Владимир Путин Федерал Мажлисга 2021 йил апрель ойида мурожаат қилган эди. Россия Федерацияси Конституциясига кўра, президент йилда бир парламентга мурожаат билан чиқиши керак. Бироқ,Путиннинг мурожаати аввал ҳам қолдирилган: 2017 йил охиридан 2018 йилнинг биринчи ярмигача.
Аввалроқ Путиннинг 10 йилдан буён ҳар декабрь ойида бўладиган катта матбуот анжумани 2022 йилда ўтказилмаслиги эълон қилинганди. Буюк Британия Мудофаа вазирлиги ҳарбий разведкаси Путиннинг матбуот анжумани Украинадаги урушнинг «муҳокамаси»дан хавфсираб, бекор қилинганини тахмин қилди.
Изоҳ (0)