Оқ уй Украина президенти Владимир Зеленский Вашингтонга ташриф буюришини ва Конгресс иккала палатасининг қўшма сессиясида нутқ сўзлаб чиқишини тасдиқлади.
Шунингдек, у АҚШ президенти Жо Байден билан учрашиб, низо зонасидаги стратегик вазиятни, санкцияларни ва Украинага кўмакни муҳокама қилади.
«Президент Жо Байден АҚШнинг Украинага содиқлигини таъкидлаб кўрсатиш учун, Украина президенти Владимир Зеленскийни Вашингтонга ташриф буюришга таклиф қилди. Президент Байден президент Зеленскийни бугун, 21 декабрь куни Оқ уйда қарши олиш имкониятини интиқлик билан кутмоқда, шундан кейин президент Зеленский Конгресс қўшма мажлисида чиқиш қилади», — дейилади Оқ уй матбуот котиби Карин Жан-Пьер баёнотида.
Оқ уй қайд этишича, Конгресснинг иккала палатаси сессиясида нутқ сўзлаш Украинани иккала партия билан кучли қўллаб-қувватлашни кўрсатади.
Зеленскийнинг ўзи ҳам АҚШга ташрифини расман тасдиқлади. У сафардан мақсад — Украинанинг барқарорлигини ва мудофаа қобилиятини мустаҳкамлашдан иборат эканини ёзди.
Бундан ташқари, Оқ уй Украинага 2 миллиард долларлик янги ёрдам пакетини эълон қилди, унга Patriot ҳаво ҳужумига қарши мудофаа батареялари киради.
Аввалроқ CNN ўз манбаларига таяниб, Зеленский 21 декабрь куни Байден билан учрашиш учун Вашингтонга учиб кетгани ҳақида хабар берганди.
Шунингдек, Америка томони навбатдаги ҳарбий ёрдам пакети доирасида Украинага Patriot зенит-ракета мажмуаларини ҳамда ўқ-дориларни «ақлли» бомбаларга айлантирадиган ускуналарни юбориши, бу келаси ҳафтадаёқ амалга оширилиши хабар берилганди.
Изоҳ (0)