20 ёшли эронлик Афшин Исмоил Қодирзода дунёдаги энг пакана одам сифатида Гиннеснинг рекордлар китобига киритилди. Унинг бўйи 64 сантиметрни ташкил қилади.
Ота-онасининг айтишича, Афшин туғилган вақтида 600 грамм вазнга эга бўлган. Шифокорларнинг салбий прогнозларига қарамай, бола яшаб кетган. Йигитнинг ўзи ташқи кўринишидан уялмайди. Ҳозир эса унинг вазни қарийб 6,5 килограммга тенг.
«Дунёдаги энг баланд бўйли одам кимлигини биламан. Мен унинг кафтларига бемалол сиғаман», — деб ҳазиллашди Афшин.
У жисмоний ўзига хосликлари туфайли иш топишга қийналаётганидан шикоят қилди. Бироқ Гиннесс рекордлари китобига кириши натижасида у қозонган шуҳрат ўз оиласини молиявий қўллаб-қувватлашда ёрдам беришига умид қилмоқда.
«Мен ўз ота-онамга ёрдам беришни орзу қиламан. Дунё бўйича эътироф этилишим менга орзумни амалга оширишда ёрдам бериши мумкин», — деди у.
Рекорд ташкилотнинг Дубайдаги идорасида қайд этилди. Гиннесс рекордлари ходимлари Афшиннинг бўйини уч марта қайта ўлчаб, у аввалги рекордчи — колумбиялик Эдвард Ниньо Эрнандесдан 6,8 сантиметрга калтароқ эканини аниқлади.
Изоҳ (0)