АҚШ Мудофаа вазирлигининг номаълум учар жисмларни ўрганувчи махсус гуруҳи сўнгги вақтларда НУЖлар аниқлангани ҳақида бир неча юзлаб хабарлар олган. Бу ҳақда Пентагоннинг разведка бўйича вазир ўринбосари Роналд Моултри маълум қилди. Бироқ унинг сўзларига кўра, муассаса ушбу объектлар Ердан ташқаридаги ҳаётга алоқадор эканини исботловчи далилларни топа олмаган.
«Биз кузатган объектлардан бирортаси Ердан ташқарида келиб чиққанини тахмин қилиш имконини берувчи ҳеч нарсани кўрмадик», — деди Роналд Моултри CBS’га берган интервьюсида. «Ерга ўзга сайёраликлар ташриф буюргани ёки бу ерда ўзга сайёраликлар фазовий кемаси ҳалокатга учраганини тахмин қилиш учун асос бўлиши мумкин бўлган ҳеч нарсани кўрмадим», — дея аниқлик киритди у.
Пентагоннинг НУЖларни ўрганиш бўйича гуруҳи сўнгги марта 2021 йилда ўз иши ҳақида ҳисобот эълон қилганди. Ўшанда идора номаълум учар жисмлар аниқлангани ҳақидаги 144 та хабар ўрганиб чиқилганини маълум қилганди. Пентагон ушбу объектларнинг баъзилари АҚШ миллий хавфсизлигига таҳдид солганини айтганди: улар ҳарбий базалар ва полигонлар яқинида аниқланган.
Пентагон 2020 йил августида НУЖлар пайдо бўлиши ҳолатларини ўрганиш учун ишчи гуруҳи тузилганини эълон қилганди. Шунингдек, аввалроқ АҚШ мудофаа идораси НУЖлар акс этган видеони эълон қилган, уларнинг келиб чиқишини аниқлашга муваффақ бўлинмаган эди.
2022 йил бошида эса АҚШ мудофаа вазирлиги — Пентагон номаълум учар жисмларни (НУЖ) ўрганадиган, бу каби ҳолатларни тергов қиладиган алоҳида бўлинма ташкил қилиниши хабар берилди.
Эслатиб ўтамиз, аввалроқ АҚШнинг собиқ президенти Барак Обама Пентагоннинг махфий архивларида ҳаракатланиш принципи тушунарсиз бўлган учар ликопчаларнинг фотосуратлари сақланиши ҳақида гапирган эди.
Изоҳ (0)