КХДР «янги стратегик қурол» учун двигателни синовдан муваффақиятли ўтказди

Шимолий Корея «янги турдаги стратегик қурол тизими» учун «катта тортиш кучига эга қаттиқ ёнилғили двигатель»ни муваффақиятли равишда синовдан ўтказди. Бу ҳақда Корея Марказий телеграф агентлиги хабар бермоқда.

«Миллий мудофаа академияси институтларидан бири 15 декабрь куни эрталаб Сохе космодромида мамлакатда ягона бўлган, 140 тонналик тортиш кучига эга қаттиқ ёнилғили двигателни  муваффақиятли синовдан ўтказди», — дейилади хабарда.

Агентлик қайд этишича, «муҳим синов» янги турдаги стратегик қурол тизимини ишлаб чиқиш учун «ишончли илмий-техник кафолат» билан таъминлаган.

КМТА маълумотларига кўра, синовга Шимолий Корея етакчиси Ким Чен Ин раҳбарлик қилган. У «энг қисқа муддатларда янги турдаги яна битта стратегик қурол яратилиши»га умид билдирди.

«Синовлар натижалари илмий жиҳатдан ва аниқ қилиб кўрсатдики, барча техник кўрсаткичлар, шу жумладан, двигатель тортиш кучи, солиштирма импулси, ўт олиш тавсифлари, ишлаш вақти ва бошқалар лойиҳадаги қийматларга мос келади, шунингдек, унинг ишончлилиги ва хавфсизлиги исботланди», — дея хулоса қилди агентлик.