14 декабрь куни Туркманистоннинг «Аваза» сайёҳлик зонасида Озарбайжон, Туркия ва Туркманистон президентлари — Илҳом Алиев, Ражаб Тоййиб Эрдўғон ва Сердар Бердимуҳамедов ўртасида уч томонлама саммит бўлиб ўтди.
Чет давлатлар раҳбари Туркманистонга биринчи хонимлар — Меҳрибон Алиева ва Эмине Эрдўғон билан бирга келди, улар учун маданий дастур ташкиллаштирилди. Бироқ уларга Сердар Бердимуҳамедовнинг рафиқаси эмас, онаси, собиқ президентнинг рафиқаси Огулгерек Бердимуҳамедова ҳамроҳлик қилди, деб ёзади «Хроника Туркменистана».
Нашр қайд этишича, Халқ Маслаҳати раиси ўз рафиқасини омма олдига олиб чиқишни бир йил аввал бошлаганди. Огулгерек Бердимуҳамедованинг суратлари биринчи марта Туркманистон агентликлари эмас, балки Туркия ОАВлари томонидан эълон қилинганди. Бу ўтган йил ноябрида бўлиб ўтган, ўшанда Ашхободда Гурбангули Бердимуҳамедов ва Ражаб Тоййиб Эрдўғон ўртасида музокаралар ўтказилган эди. 2022 йил майида эса Туркманистон гилами кунида собиқ биринчи хоним ўзининг президент ўғлидан «Туркманистонда хизмат кўрсатган гиламдўз» унвонини олди. Шунингдек, у турмуш ўртоғининг сентябрда Японияга ташрифи чоғида унга ҳамроҳлик қилди.
Туркманистоннинг ҳозирги президенти рафиқасига келсак, ҳозирча у бир марта омма олдига чиқди. Бу апрелнинг илк саналарида, Туркманистонга Ҳиндистон президенти Рам Натх Ковинд ўз рафиқаси Савита Ковинд билан келганида юз берганди. Ўз ҳамкасбининг ташрифи шарафига кичик Бердимуҳамедов расмий зиёфат ташкил қилган, унда давлат раҳбарларининг рафиқалари ҳам қатнашганди.
Авазада Туркия ва Озарбайжон биринчи хонимлари нималар билан машғул бўлгани Меҳрибон Алиеванинг Facebook’даги саҳифасида тўлиқ ёритилди.
Меҳмонлар, хусусан, Туркманистон тасвирий ва амалий безак санъати кўргазмасига борган, улар учун концерт ва Туркманистон миллий либослари намойиши тақдим этилган. Шундан кейин Меҳрибон Алиева, Эмине Эрдўғон ва Огулгерек Бердимуҳамедова чой устида суҳбатлашган.
Изоҳ (0)