Ўзбекистонда аҳолининг инфляцион кутилмалари маълум қилинди

Марказий банк ноябрь ойида ўтказилган сўров натижаларига кўра, аҳоли томонидан сезилган инфляция даражасини маълум қилди.

Ноябрь ойида аҳолининг келгуси 12 ой учун нархлар ўзгариши бўйича инфляцион кутилмалари ўтган ойга нисбатан бироз юқорилаб, 15,3 фоиз атрофида шаклланган бўлса, медиана қиймати 14,1 фоизгача тезлашди.

Инфляцион кутилмалар — турли гуруҳлар бўйича мос жавобни белгилаган аҳоли сонининг ўша жавоблар ўртача қийматига кўпайтмалари йиғиндисини жами аҳоли сонига нисбати (ўртача кўрсаткич).

Келгуси 12 ойда инфляция кўрсаткичи жорий даражада ёки ундан юқорироқ бўлишини кутаётган респондентларнинг улуши аввалги ойга нисбатан 9 фоиз бандга юқорилаган.

Инфляцион кутилмаларнинг жорий инфляцияга нисбати (респондентлар улуши, фоизда):

Ноябрь ойида инфляцияни келгусида 13—16 фоиз атрофида бўлишини кутаётган аҳоли улуши сезиларли даражада ортган.

Келгуси даврда нархларга оширувчи босим кўрсатиши мумкин бўлган асосий омиллар сифатида валюта курсининг қадрсизланиши (51 фоиз), ёнилғи ва энергия ресурслари нархининг қимматлашиши (38 фоиз) таъкидланган.

Шу билан бирга, асосий озиқ-овқат маҳсулотларининг қимматлашиши таъкидлаганлар камайган бўлса, нархларнинг сунъий оширилиши кўрсатганлар улуши ойга нисбатан бироз юқорилаган.

Аввалроқ халқаро агентлик Ўзбекистон иқтисодий ўсиш прогнозларини яхшилагани ҳақида хабар берилганди.