Россия яна Европа Иттифоқининг асосий газ етказиб берувчисига айланиш имкониятига эга — Bloomberg

Россия Европа Иттифоқига асосий газ етказиб берувчи мақомини тиклаш имкониятига эга. Бу ҳақда Bloomberg маълумот бермоқда.

Масалан, Саксония федерал штати бош вазири Майкл Крецҳмер бутунлай Россия газисиз қолиш «тарихий билимсизлик ва геосиёсий жиҳатдан нотўғри» бўлишини билдирган.

Кўплаб германиялик сиёсатчилар учун нархлар муҳим. Берлин энди газ импортида ҳар МВт/соат учун 180 доллар тўламоқда. Бу 2010 йилдан 2020 йилгача бўлган ўртача кўрсаткичдан қарийб етти баравар кўп.

Германия ўз истеъмолчилари ва компанияларидаги газ билан боғлиқ вазиятни юмшатиш учун субсидияларга миллиардлаб маблағ сарфламоқда.

Украинада уруш бошланишидан олдин Россия ўз газининг қарийб 40 фоизини Европага етказиб берган.

Агентлик қайд этишича, ўнлаб йиллар давомида қурилган «энергия кўприги» Совуқ уруш, СССР парчаланиши ва Европа энергия бозорларининг либераллашувига бардош берди. Бироқ Украинада уруш бошланганидан сўнг, Россия газининг улуши сезиларли даражада пасайишни бошлади.

Халқаро энергетика агентлиги (IEA) сценарий моделини ишлаб чиқди: унда 2025 йилга келиб Россия газининг Европага етказиб берилиши минимал даражага, 2028 йилга келиб эса қуёш ва шамол электр станцияларида ишлаб чиқариш ортиши ҳамда LNG импорти ҳисобига нолга тушади.

IEA Россия—Европа газ савдосидаги юзага келган бўшлиқ доимий сақланиб қолади, деб ҳисоблайди.

Bloomberg’да қайд этилишича, агар бу содир бўлса, у нафақат Европа энергия бозорлари ва уларнинг саноати учун, балки Қатардан Мозамбик ва АҚШгача бўлган газ инвестицияларининг келажагига ҳам таъсир қилади.

Европа ҳеч қачон Россия билан эски, узоқ муддатли шартномаларига қайтмаслиги мумкин, аммо кимё, озиқ-овқат ва оғир саноатни рақобатбардошлигини сақлаб қолмоқчи бўлса, унга арзон газ керак бўлади.

Европа учун эса Россия газидан арзонроқ вариант йўқ, — деб таъкидлайди мақола муаллифи.

Унинг фикрича, келажакда Украина Европа Иттифоқидан ўз ҳудудидан қувурлар орқали етказиладиган Россия газини сотиб олишини талаб қилиши мумкин.

Аввалроқ Европа Иттифоқининг 12 та давлати Россия гази нархининг юқори чегарасини камайтиришни талаб қилгани ҳақида хабар берилганди.

Европа комиссияси таклиф қилган режага кўра, агар Амстердам фонд биржасида газ нархи камида икки ҳафта давомида 1 МВт/соат учун 275 евродан (1000 куб метрга тахминан 3 минг доллар) ошса, чеклов кучга киради.

Бунинг учун LNG нархи билан фарқ камида ўн кун давомида 58 евродан ошиши керак.