Ўзбекистонда энг кўп ипотека кредити ажратаётган банклар рўйхати эълон қилинди

Ўзбекистонда январь—ноябрь ойларида энг кўп ипотека кредити ажратган банклар рўйхати маълум бўлди. Бу ҳақда Молия вазирлиги хабар бермоқда.

2022 йил 1 декабрь ҳолатига кўра, янги тартиб доирасида банклар томонидан умумий 7,3 трлн сўмлик ипотека кредити ажратилган.

Маълумотларга кўра, «Қишлоқ қурилиш банки» ипотека кредити бераётган 12 та банк орасида етакчилик қилмоқда. Йил бошидан бери банк томонидан 1,7 трлн сўмлик бундай кредити ажратилган.

Иккинчи ўринда 1,5 трлн сўм кредит берган «Ипотека банк» жойлашган. Учинчи ўринни эса «Ўзмиллийбанк» 1,2 трлн сўмлик ипотека кредити билан эгаллаган.

Берилган ипотека кредитларининг қиймати бўйича кейинги ўринларда:

• «Халқ банки» — 837 млрд сўм;
• «ОФБ» — 629 млрд сўм;
• «ЎзСҚБ» — 283 млрд сўм;
• «Микрокредитбанк» — 257 млрд сўм;
• «Ҳамкорбанк» — 239 млрд сўм;
• «Асакабанк» — 196 млрд сўм;
• «Агробанк» — 195 млрд сўм;
• «Алоқабанк» — 174 млрд сўм.

«Туронбанк» жорий йил бошидан бери 121 млрд сўмлик ипотека кредити билан энг охирги ўрини эгаллаган.

Аввалроқ Ўзбекистонда йил бошидан бери қанча одам ипотека кредити олгани маълум бўлганди.