S&P Global Ratings xalqaro reyting agentligi O‘zbekistonning xorijiy va milliy valyutadagi uzoq muddatli va qisqa muddatli suveren kredit reytinglarini “BB-/B” darajasida tasdiqladi.
Bu yil Rossiyadan pul o‘tkazmalari kutilganidan ham ko‘proq bo‘lganligi sababli O‘zbekiston iqtisodiyoti Rossiya va Ukraina o‘rtasidagi urush ta’sirini S&P tahlilchilari dastlab kutganidan ham yaxshiroq yengib o‘tdi.
Yanvar—oktabr oylariga ko‘ra, Rossiya Xitoydan keyin O‘zbekistonning eng yirik savdo hamkori hisoblanadi — 7,4 mlrd dollar.
O‘zbekistonda inflyatsiya tezlashdi va hukumat uy xo‘jaliklarini qo‘llab-quvvatlash uchun ijtimoiy xarajatlarni oshirishga majbur bo‘ldi. Bu esa mamlakatda 2022-yilgi budjet taqchilligining oshishiga olib keldi.
Agentlik ekspertlari Rossiyadan O‘zbekistonga noodatiy darajada yuqori pul o‘tkazmalari davom etishini kutmayapti.
Hisobotda aytilishicha, Rossiya—Ukraina mojarosining davom etayotgan salbiy mintaqaviy ta’siri, zaif global iqtisodiy o‘sish va monetar keskinlashuv 2023-yildan boshlab rivojlanayotgan bozorlar, jumladan, O‘zbekiston uchun iqtisodiy o‘sish va moliyalashtirish sharoitlariga qo‘shimcha xavf tug‘dirishi mumkin.
S&P O‘zbekistonda 2022-yilda yalpi ichki mahsulotning real o‘sishi prognozini avval kutilgan 3,5 foizdan 5,7 foizgacha yaxshiladi. Kelgusi yilda bu ko‘rsatkich 5 foizga, 2024 va 2025-yillarda 5,5 foizga o‘sishi kutilmoqda.
Barqaror prognoz agentlikning O‘zbekistonning nisbatan kuchli moliyaviy va tashqi pozitsiyasi uning iqtisodiyotiga kelgusi 12 oy davomida salbiy makroiqtisodiy omillarni yengib o‘tishga yordam berishi kerakligi haqidagi taxminini aks ettiradi.
O‘zbekistonning moliyaviy va tashqi mavqei hozirda agentlik kutganidan ko‘proq zaiflashsa, S&P reytingini pasaytirishi mumkin.
Kelgusi yilda O‘zbekistonning reytingi yaxshilanishi dargumon. Agar mamlakatda olib borilayotgan iqtisodiy islohotlar va jahon iqtisodiyoti bilan integratsiyalashuvning kuchayishi iqtisodiy o‘sish salohiyatini oshirishga va eksport tushumlarini kengroq diversifikatsiya qilishga olib kelsa, bu amalga oshishi mumkin, — deydi agentlik tahlilchilari.
Mavzuga doir: S&P tomonidan O‘zbekiston suveren kredit reytingi barqaror darajada tasdiqlandi
Izoh (0)