Йил бошидан бери Ўзбекистонда кредитлар ҳажми, товар хом ашё биржаси фаолияти қандай ўзгаргани таҳлил қилинди. Бу ҳақда «Дарё»га Иқтисодий тадқиқотлар ва ислоҳотлар маркази хабар бермоқда.
Банклар томонидан берилган кредитлар ҳажми йил бошидан буён ўтган йилнинг шу даврига нисбатан 8,7 фоизга ошди.
Кредитлар бериш ҳажми Фарғона (28,9 фоиз), Самарқанд (23,6 фоиз), Тошкент (22,4 фоиз), Андижон (10 фоиз) вилоятларида, Қорақалпоғистон (20,7 фоиз) ва Тошкент (12,7 фоиз) шаҳрида сезиларли даражада ошгани қайд этилди.
Таҳлил қилинаётган даврда Ўзбекистон товар-хом ашё биржасида амалга оширилган битимлар ҳажми 37,8 фоизга ўсди. Биржа фаолиятининг сезиларли ўсиши Хоразм (56,4 фоиз), Жиззах (49,3 фоиз), Самарқанд (46,2 фоиз), Навоий (43,6 фоиз) вилоятларида ва Тошкент (46,9 фоиз) шаҳрида кузатилди.
Ушбу ҳудудларда тузилган битимлар ҳажмининг ўсиши минерал ўғитлар, техник чигит, автомобиль бензини, дизель ёқилғиси, қурилиш ва хўжалик материаллари, ўсимлик ёғи, буғдой уни, буғдой, шакар, пахта толаси, қора ва рангли металлар, полиэтилен, полипропилен, этил спирти ва бошқа маҳсулотлар савдосининг кўпайиши ҳисобидан эришилган.
Шунингдек, жорий йилнинг 1 январидан 30 ноябригача бўлган даврда мамлакат солиқ тушумлари ҳажми ўтган йилнинг шу даврига нисбатан 17,2 фоизга ошган.
Фарғона (34,2 фоиз), Самарқанд (34 фоиз), Бухоро (32,6 фоиз), Жиззах (31,7 фоиз), Сирдарё (29,6 фоиз) вилоятларида, Қорақалпоғистон Республикасида (31,9 фоиз) ва Тошкент шаҳрида (42,7 фоиз) солиқ тушумларининг сезиларли ўсиши қайд этилди.
Бюджетга солиқ тушумларининг ўсиши барқарор тенденцияни сақлаб келмоқда.
Таҳлилларга кўра, жорий йилнинг 11 ойи давомида солиқ тушумларининг ўсишига: қўшилган қиймат солиғи (32,6 фоиз) ва айланмада олинадиган солиқ (44,4 фоиз) катта таъсир кўрсатди.
Изоҳ (0)