Тадбиркор Илон Маск томонидан сотиб олинганидан сўнг, Twitter харажатларни камайтириш учун офис ижарасини тўлашни тўхтатди. Бу ҳақда The New York Times компаниядаги манбаларига таяниб хабар берди.
Маълумотларга кўра, Twitter’нинг Сан-Франсискодаги (Калифорния штати) бош офиси, шунингдек, компаниянинг бошқа мамлакатлардаги ваколатхоналари жойлашган бинолар учун ижара ҳақи тўлаш тўхтатилган.
Шунингдек, компания аввалги раҳбарият томонидан фойдаланилган хусусий авиаташувчилар хизматлари учун ҳақ тўлашни тўхтатган.
Бундан ташқари, компания ишдан бўшатилган ходимларга ишдан бўшатилиш нафақасини беришни ҳам тўхтатмоқчи.
Манбаларга кўра, бундай қатъий чоралар компания харажатларини камайтиришга қаратилган.
Шу муносабат билан Twitter’да судга берилиши кутилмоқда, бу фонда Маск ўзининг адвокатлар жамоасини кучайтирмоқда.
Илон Маск Twitter’ни сотиб олиш бўйича келишувни 27 октябрь куни якунлаб, компания учун 44 миллиард доллар тўлаган.
Шундан сўнг тадбиркор ижтимоий тармоқ ходимларининг ярмига яқинини ишдан бўшатди, қолганларни эса юқори интенсивлик билан ишлаш кераклиги ҳақида огоҳлантирди.
ОАВ хабарларига кўра, ушбу воқеалар фонида платформа фаолиятини сақлаб қолиш учун муҳим бўлган кўплаб ходимлар Twitter’ни тарк этган.
Аввалроқ Илон Маск дунёнинг энг бой одамлари рейтингида етакчиликни бой бергани ҳақида хабар берилганди.
Изоҳ (0)