Европарламент Қатардан пора олганликда айбланаётган вице-президент Ева Кайлини лавозимидан озод этишга қарор қилди. Бу ҳақда Le Monde хабар берди.
Маълум қилинишича, Европарламентдаги депутатларнинг 625 нафари Кайлининг лавозимидан озод этилишини қўллаб-қувватлаган. Кайли Форс кўрфази мамлакатларидан бири томонидан «Европа парламентининг иқтисодий ва сиёсий қарорларига таъсир ўтказиш» мақсадида берилган пора ҳақидаги иш бўйича сўроқ қилиниш учун ушланган. Бельгия полицияси Европа парламенти офисларида рейд ўтказган, федерал прокурорга кўра, бир неча кун ичида 20 та тинтув ўтказилган.
Бельгияда Кайли ва яна уч кишига коррупция бўйича айблов қўйилган ва уларнинг активларни музлатилган. Қарор Грециянинг пул ювишга қарши кураш бошқармаси раҳбари Ҳараламбос Вурлиотис томонидан қабул қилган. Активларни музлатиш чоралари молия институтлари ва тегишли давлат органлари томонидан амалга оширилиши керак.
Кайлининг ҳибсга олиниши
9 декабрда Европарламент вице-президенти Ева Кайли Қатарда бўлиб ўтадиган футбол бўйича 2022 йилги жаҳон чемпионати атрофидаги коррупция иши бўйича қўлга олинганди. Бельгия полицияси Кайлининг уйида рейд уюштирган. Аввалроқ Бельгия прокуратураси йирик операцияси ўтказилгани, унинг давомида тўрт киши, жумладан, собиқ Европарламент депутати Пьер-Антонио Панзери ва Халқаро касаба уюшмалари конфедерацияси президенти Лука Висентини қўлга олингани ҳақида хабар берганди. Собиқ депутатнинг қароргоҳидан 500 минг евро нақд пул топилган.
Изоҳ (0)