Politico нашри Зеленскийни энг нуфузли европалик, Путинни эса йилнинг энг омадсиз одами деб эълон қилди

Украина президенти Владимир Зеленский Politico нашри версиясига кўра 2022 йилда Европанинг энг нуфузли (таъсири кучли) одамига айланди.

«Сиз қаранг, европалик етакчилар ўша машҳур яшил футболкасини кийиб олган 44 ёшли салобатли киши билан суратга тушиш учун Киевга югурмоқда. Унга ёнма-ён туриш орқали, сиёсатчилар кўзга ташланишга орзуманд бўлмоқда. Зеленский Европани унинг келажаги Украина билан боғлиқлигига ишонтирди — Россия февралда бостириб киргунига қадар бунга жуда кам одам ишонарди», — дейилади Зеленскийга бағишланган мақолада.

Politico’нинг 2022 йилда Европанинг энг таъсири кучли одамлари рейтингига 28 нафар сиёсатчи кирди. Улар орасида Россия президенти Владимир Путин ҳам тилга олинган бўлиб, уни нашр «йилнинг энг омадсиз одами» деб эълон қилди.

«Владимир Путиннинг буюк Россия ҳақидаги орзуси амалга ошиши амри маҳол. Унинг Украинага кенг кўламли босқини қандай тез бошланган бўлса, шундай тезликда муваффақиятсизликка учрай бошлади… Бу Россияни ўзи етарлича баҳоламаган ва нафратланиб келган душманини мағлуб этишга қодир бўлмаган учинчи даражали мамлакат мавқейига тушириб қўйди, — деб ёзади Politico муаллифлари. — Путиннинг қайсарлиги уруш, катта эҳтимол билан, чўзилиб кетишини англатади… Путиннинг ўз орзусини амалга оширишга қодир эмаслиги у энди ўз қўшнилари учун даҳшат солмаслигини билдиради».

Украина президенти Владимир Зеленский Американинг Time журнали ва Британиянинг Financial Times газеталари томонидан ҳам йил одами деб эълон қилинган.

Аввалроқ Зеленский Politico нашрига қаратилган видеомурожаатида Украинадаги низо 2023 йилга келиб якунланиши мумкин, дея тахмин қилган эди. «Ишонаманки, украиналиклар келаси йилда ҳам энг таъсири кучли бўлади, лекин у пайтда аллақачон тинч замон келган бўлади», — деди Зеленский.