БМТ Бош ассамлеяси 7 декабрь куни Россия томонидан таклиф этилган учта резолюцияни қабул қилди, деб ёзади «Коммерсантъ».
Улар орасида «Биринчи бўлиб коинотга қурол жойлаштирмаслик» резолюцияси ҳам бўлиб, ушбу лойиҳа 2 ноябрь куни қабул қилинганди. Шунингдек, ахборот хавфсизлиги ва қурол-яроғ устидан назорат бўйича шартномалар тизимини мустаҳкамлаш ҳақидаги резолюциялар ҳам маъқулланди.
Коинотга қурол жойлаштирмаслик ҳақидаги резолюцияни ёқлаб 122 та мамлакат овоз берди, 50 таси қарши чиқди, 4 та мамлакат эса бетараф қолди. Резолюция Россия ва Хитой томонидан 2008 йилда қуролсизланиш бўйича конференцияда киритилган, фазога қурол жойлаштириш олдини олиш тўғрисидаги шартномани тўлдиришни кўзда тутади.
Россия ва АҚШ ҳукумати бир-бирини доимий равишда коинотни «ҳарбийлаштириш»да айблаб келади. 2021 йил охирида АҚШ Давлат департаменти Россияни космик қуролни синовдан ўтказишда айблади. 2022 йил августида Россиянинг БМТдаги делегацияси АҚШ томонидан коинотга ядро қуроли жойлаштирилиши эҳтимолини истисно қилмади.
2015 йилда АҚШ Россия ва яна 26 та давлат томонидан ишлаб чиқилган, коинотга биринчи бўлиб қурол жойлаштирмаслик ҳақидаги резолюцияга қарши чиқди. Америка томони ҳужжат охиригача ишлаб чиқилмаганини пеш қилди. Хусусан, қайд этилганидек, ҳужжатда «фазодаги қурол» деганда нима назарда тутилиши аниқ қилиб ёзиб қўйилмаган.
Мавзуга доир:
- БМТ Бош ассамблеяси Россия томонидан Украинага товон пули тўланиши ҳақида резолюция қабул қилди. Ўзбекистон бетараф қолди
- БМТ Бош ассамблеяси Украина ҳудудларининг Россия томонидан босиб олинишини қораловчи резолюцияни қабул қилди. Ўзбекистон бетараф қолди
- БМТ Бош ассамблеяси Россиянинг референдумлар бўйича яширинча овоз бериш таклифини рад этди
Изоҳ (0)